काठमाडौं। राष्ट्रिय स्वतन्त्र पार्टी (रास्वपा) का सांसद अमरेश कुमार सिंहले मधेसका घटनामा सुरक्षा निकायको भूमिकामाथि प्रश्न उठाउँदै सरकारसँग जवाफ मागेका छन्। उनले मधेसमा हुने आन्दोलन तथा तनावका बेला बल प्रयोगको शैलीमाथि आपत्ति जनाउँदै सरकारले समान र न्यायपूर्ण सुरक्षा नीति अवलम्बन गर्नुपर्ने बताएका छन्।

प्रतिनिधिसभाको बैठकमा बोल्दै सांसद सिंहले मधेसमा सामान्य अवस्था नियन्त्रण गर्नका लागि पनि किन सिधै गोली चलाउने अवस्था सिर्जना हुन्छ भन्दै प्रश्न गरे। उनले भीड नियन्त्रणका अन्तर्राष्ट्रिय रूपमा स्वीकृत वैकल्पिक उपाय प्रयोग नगरी घातक बलको प्रयोग गरिनु गम्भीर विषय भएको उल्लेख गरे।

‘मधेसमा मात्रै गोली किन चल्छ? मधेसमा पानीको फोहोरा किन चल्दैन? मधेसमा टियर ग्यास किन चल्दैन? मधेसमा अश्रु ग्यास किन चल्दैन,’ उनले सोधे।

सिंहले देशका सबै नागरिकप्रति राज्यको व्यवहार समान हुनुपर्ने उल्लेख गर्दै कुनै पनि क्षेत्र वा समुदायप्रति विभेदपूर्ण सुरक्षा नीति स्वीकार्य नहुने बताए। उनले सुरक्षा निकायले भीड नियन्त्रणका क्रममा न्यूनतम बल प्रयोग गर्ने सिद्धान्त पालना गर्नुपर्ने र घटनाको निष्पक्ष छानबिन गरी आवश्यक सुधारका कदम चाल्न सरकारसँग माग गरे।

उनले मधेसमा पटक-पटक हुने घटनाबाट स्थानीय नागरिकमा असुरक्षाको भावना बढ्दै गएको भन्दै सरकारले सुरक्षा संयन्त्रको कार्यशैलीको समीक्षा गरी नागरिकको जीवन र अधिकारको संरक्षणलाई प्राथमिकतामा राख्नुपर्नेमा जोड दिए।