काठमाडौं। लिखुपिके गाउँपालिकाका अध्यक्ष मिना कार्की बस्नेतले गाउँपालिकाको समग्र विकासका लागि शिक्षालाई प्राथमिकतामा राखेर काम गरिरहेको बताएकी छन्।

हिमगंगा पूर्वविद्यार्थी समाज, नेपालको तेस्रो वार्षिक साधारणसभा तथा प्रथम अधिवेशनलाई सम्बोधन गर्दै अध्यक्ष कार्कीले लिखुपिकेका सबै नागरिकलाई जोड्ने प्रयास गरेकोमा पूर्वविद्यार्थी समाजलाई धन्यवाद दिइन्। उनले गाउँपालिकाभित्रका विद्यालयहरूको वृद्धि र विकासमा

समाजले महत्वपूर्ण भूमिका निर्वाह गर्ने विश्वास व्यक्त गरिन्।

‘सबैभन्दा ठूलो विकास भनेकै शिक्षा हो। शिक्षा विकास भयो भने मात्रै समाज परिवर्तन हुन्छ,’ उनले भनिन्।

अध्यक्ष कार्कीले शिक्षा विद्यार्थी जीवनमा मात्र सीमित नहुने बताउँदै जन्मदेखि मृत्युसम्म निरन्तर सिकाइ आवश्यक रहेको धारणा राखिन्। उनले गाउँपालिकाका सबै नागरिकलाई समान व्यवहार गर्दै आएको दाबी गरिन्।

‘यो समाजका सबै मान्छे र लिखुपिकेका सबै जनता मेरा लागि बराबर हुन्। मैले कसैलाई कुनै किसिमको भेदभाव गर्दिनँ र गरेको छैन,’ उनले भनिन्।

हिमगंगा माध्यमिक विद्यालयको विकासका लागि गाउँपालिकाले सक्दो सहयोग गर्दै आएको र आगामी दिनमा पनि निरन्तरता दिने उनले बताइन्। विद्यालय, शिक्षक र विद्यार्थीलाई उपलब्ध गराइने सेवा तथा सुविधामा गाउँपालिकाले कुनै विभेद नगरेको उनको भनाइ छ।

अध्यक्ष कार्कीका अनुसार हिमगंगा माविको नयाँ भवन निर्माणका लागि गाउँपालिकाले विस्तृत परियोजना प्रतिवेदन (डीपीआर) तयार गरिसकेको छ। विद्यालय भवन निर्माणका लागि ठूलो बजेट आवश्यक पर्ने भएकाले गाउँपालिका  को वार्षिक बजेटबाट मात्रै तत्काल सम्पूर्ण निर्माण सम्पन्न गर्न कठिन रहेको उनले बताइन्।

‘वार्षिक बजेट नै पालिकाको ६-७ करोड हुन्छ। दुई वर्षको बजेट हाल्दा पनि भवन बनाउन पुग्दैन,’ उनले भनिन्, ‘त्यसमा पनि २-३ करोड गर्दै हामीले विद्यालयको विकासका लागि काम गरिरहेका छौँ।’

उनले गाउँपालिकाले शिक्षालाई प्रविधिमैत्री तथा डिजिटल रूपमा रूपान्तरण गर्ने प्रयाससमेत गरिरहेको जानकारी दिइन्। विद्यालयको शैक्षिक गुणस्तर सुधारसँगै डिजिटल प्रविधिको प्रयोग बढाउनेतर्फ पालिकाले काम गरिरहेको उनको भनाइ छ।