काठमाडौं । यस वर्ष लोकसेवा आयोगको विज्ञापन नगराउने सरकारको निर्णयप्रति लोकसेवा तयारी गरिरहेका विद्यार्थीहरूले तीव्र असन्तुष्टि जनाएका छन्। उनीहरूले सरकारको निर्णयले लाखौँ विद्यार्थीको रोजगारीको अधिकार र भविष्यमा प्रत्यक्ष असर परेको भन्दै तत्काल निर्णय सच्याउन माग गरेका छन्।

नेसनल प्रेस क्लब नेपालको कार्यालय, अनामनगरमा आयोजित ‘लोकसेवा अध्ययनरत विद्यार्थीको पत्रकार सम्मेलन’ मा बोल्दै नायब सुब्बा (नासु) पदको तयारी गरिरहेका विद्यार्थी मिलन सिंह ठकुरीले सरकारले यस वर्ष लोकसेवाको विज्ञापन नगराउने निर्णय गरेको भन्दै घोर आपत्ति जनाए।

ठकुरीका अनुसार विद्यार्थीहरूले आफ्ना मागबारे सामान्य प्रशासनमन्त्री प्रतिभा रावललाई समेत ध्यानाकर्षण गराएका छन्। मन्त्री रावलले माग सम्बोधन गर्ने आश्वासन दिएको भए पनि त्यसपछि ठोस पहल नभएको उनले बताए।

विद्यार्थीहरूले सामान्य प्रशासन मन्त्रालयका सचिवलाई समेत भेटेर ध्यानाकर्षण गराउनुका साथै लिखित विज्ञप्तिसमेत बुझाएको बताए। कानुन मन्त्रालयमा समेत आफ्ना समस्या राखेको भए पनि सम्बन्धित निकायबाट अपेक्षित प्रतिक्रिया नआएको ठकुरीको भनाइ छ।

गृह मन्त्रालयमा समेत आफूहरू पुगेको उल्लेख गर्दै उनले गृहमन्त्रीका स्वकीय सचिव जेम्स कार्कीले आफूहरूलाई आन्दोलन गर्न चुनौती दिएको आरोप लगाए।

‘हामीले हाम्रो समस्या राख्न गृह मन्त्रालय पनि गयौँ। गृहमन्त्रीका स्वकीय सचिव जेम्स कार्कीले हामीलाई धम्क्याउनुभयो। उहाँले ‘आन्दोलन गर्नुस् न, लड्नु न। आन्दोलन नगर्नु भनेर कसले भनेको छ?’ भन्दै थर्काउनुभयो,’ ठकुरीले भने।

लोकसेवा परीक्षा तथा विज्ञापन रोकिँदा विद्यार्थीको रोजगारीको हकमाथि नै खेलबाड हुने उनको दाबी छ। हरेक वर्ष ठूलो संख्यामा विद्यार्थी लोकसेवाको तयारीमा रहने भन्दै उनले सरकारले उनीहरूको भविष्यबारे स्पष्ट बाटो तय गर्नुपर्ने बताए।

‘वर्षमा ४/५ लाख विद्यार्थी लोकसेवा पढ्छन्। ती ४/५ लाख विद्यार्थीलाई सरकारले बाटो देखाउनुपर्छ। नत्र लोकसेवाको परीक्षा रोक्न पाइँदैन,’ उनले भने।

विद्यार्थीहरूले लोकसेवा आयोगको विज्ञापन तत्काल खुलाउनुपर्ने, आवश्यक सिट संख्या निर्धारण गर्नुपर्ने तथा परीक्षा सञ्चालनको स्पष्ट कार्यतालिका सार्वजनिक गर्नुपर्ने माग राखेका छन्।

सरकारले आफूहरूको मागलाई बेवास्ता गरे कडा आन्दोलनमा उत्रिने चेतावनीसमेत ठकुरीले दिए।

‘हाम्रो माग सरकारले सम्बोधन गर्नुपर्छ। हाम्रो सिट संख्या निर्धारण गर्नुपर्छ। यदि सरकारले हाम्रा माग बेवास्ता गरे भदौ २३ र २४ को भन्दा ठूलो आन्दोलन हुन्छ। लाखौँ विद्यार्थी सडकमा आउँछन्,’ उनले चेतावनी दिए।