काठमाडौं । वरिष्ठ पत्रकार ऋषि धमलाले लोकसेवा आयोगको तयारी गरिरहेका विद्यार्थीले आफ्नो मागका लागि पत्रकार सम्मेलन गर्नुपर्ने अवस्था आउनु दुःखद् भएको बताएका छन्। उनले लोकसेवा तयारी गरिरहेका विद्यार्थीलाई परीक्षा दिन पाउने वातावरण बनाउन र आयोगको विज्ञापन खुलाउन सरकारसँग आग्रह गरेका छन्।

अनामनगरस्थित नेसनल प्रेस क्लब नेपालको कार्यालयमा आयोजित ‘लोकसेवा अध्ययनरत विद्यार्थीको पत्रकार सम्मेलन’ मा बोल्दै धमलाले नेपालमै केही गर्ने र सरकारी सेवामा प्रवेश गर्ने सपना बोकेका युवाले आन्दोलन गर्नुपर्ने अवस्था कसरी आयो भन्ने विषयमा सरकारले गम्भीरतापूर्वक सोच्नुपर्ने बताए।

‘धेरै मान्छेका धेरै सपना हुन्छन्। ती सपनामध्ये एउटा लोकसेवा आयोग पनि हो। लोकसेवा पढिरहेका मान्छेले यसरी पत्रकार सम्मेलन गर्नुपर्ने स्थिति आउनु दुःखद् कुरा हो। यही देशमा केही गर्छु र यही देशका कार्यालयमा काम गर्छु भन्ने युवाहरूले यसरी आन्दोलन गर्नुपर्ने दिन कसरी आयो? सरकारले सोच्नुपर्छ,’ उनले भने।

विद्यार्थीले परीक्षा दिन पाउनुपर्ने र देशको सेवा गर्ने अवसरबाट वञ्चित गर्न नहुने उनको भनाइ थियो।

‘विद्यार्थीले जाँच दिन नपाउने? देशको सेवा गर्न नपाउने?’ उनले प्रश्न गरे।

लोकसेवा तयारी गरिरहेका विद्यार्थीमध्ये अधिकांश गरिब, किसान तथा मजदुर परिवारका छोराछोरी रहेको उल्लेख गर्दै धमलाले उनीहरूको भविष्य अन्योलमा पार्ने काम गर्न नहुने बताए।

‘म लोकसेवा पढिरहेका विद्यार्थीको पक्षमा छु। लोकसेवा पढ्ने विद्यार्थी गरिब, किसान, मजदुरका छोराछोरी हुन्। उनीहरूले यही देशमा केही गर्छु भन्न नपाउने हो? यो समस्याको समाधान सरकारले खोज्नुपर्छ,’ उनले भने।

धमलाले लोकसेवा तयारी गरिरहेका विद्यार्थीलाई देशको भविष्यको रूपमा चित्रण गर्दै उनीहरूले परीक्षा दिन पाउनुपर्ने र लोकसेवा आयोगले नियमित रूपमा विज्ञापन खुलाउनुपर्ने बताए।

‘लोकसेवाका विद्यार्थी यो देशका भविष्य हुन्। लोकसेवाका विद्यार्थीले परीक्षा दिन पाउनुपर्छ। लोकसेवा आयोगले विज्ञापन खुलाउनुपर्छ। म त्यो मागमा लोकसेवा पढिरहेका विद्यार्थीको पक्षमा चट्टान बनेर उभिन्छु,’ उनले भने।

विद्यार्थीका मागका विषयमा आफूले लोकसेवा आयोग, सामान्य प्रशासन मन्त्रालय र प्रधानमन्त्री तथा मन्त्रिपरिषद्को कार्यालयसँग समेत कुरा गर्ने उनले बताए।

समस्या आउँदा विद्यार्थीहरू आत्तिन नहुने भन्दै धमलाले आज लोकसेवा तयारी गरिरहेका विद्यार्थी नै भोलि देशको प्रशासनिक नेतृत्वमा पुग्ने बताए।

‘भोलि तपाईं नै यो देशको मुख्यसचिव, सचिव, राजदूत बन्नुहुन्छ। यो देशको प्रशासनिक क्षेत्रलाई तपाईंहरूले नेतृत्व गर्नुपर्छ,’ उनले भने।

पुरानो शैलीबाट मात्रै प्रशासन सञ्चालन गर्न नसकिने भन्दै उनले देश निर्माणमा सक्षम र दक्ष प्रशासनको महत्वपूर्ण भूमिका हुने बताए। देशमा भएका विकास निर्माण तथा प्रशासनिक काममा कर्मचारीतन्त्रको योगदान रहेको उल्लेख गर्दै उनले सरकार र प्रशासनबीच सहकार्य आवश्यक रहेको धारणा राखे।

‘पुरानो तरिकाले प्रशासन चल्दैन। देश बनाउने प्रशासनले हो। अब त्यसका लागि तपाईंहरू तयार हुनुपर्छ। यो देशमा जति काम भएका छन्, प्रशासनले बनाएको हो,’ धमलाले भने।

लोकसेवा आयोगले आफ्नो अधिकार प्रयोग गर्दै विज्ञापन खुलाउनुपर्नेमा जोड दिँदै उनले विद्यार्थीलाई आफ्नो अधिकारका लागि शान्तिपूर्ण रूपमा आवाज उठाउन आग्रह गरे।

‘लोकसेवा आयोगले जसरी पनि विज्ञापन खुलाउनुपर्छ। आफ्नो अधिकारका लागि लड्नुपर्छ। तपाईंहरू लड्नुस्। यो आन्दोलन देशका लागि हो, जनताका लागि हो,’ उनले भने।

लोकसेवा आयोगको परीक्षा तथा छनोट प्रक्रियामा कुनै किसिमको धाँधली हुन नहुनेमा समेत धमलाले जोड दिए। लोकसेवा तयारी गरिरहेका विद्यार्थीको आन्दोलनमा पत्रकारिता क्षेत्रले साथ दिने प्रतिबद्धता व्यक्त गर्दै उनले सञ्चारकर्मीहरूलाई उनीहरूको आवाज उठाउन आग्रह गरे।

‘लोकसेवामा धाँधली हुनु हुँदैन। लोकसेवाका विद्यार्थीलाई पत्रकारिता क्षेत्रले सहयोग गर्छ। अहिले सजिलो छ। पत्रकारहरूलाई आह्वान गर्छु– उहाँहरूलाई सहयोग गर्नुस्,’ धमलाले भने।