काठमाडौं । साउनको अन्तिम सोमबारका अवसरमा काठमाडौंको पशुपतिनाथ मन्दिरमा बिहानैदेखि भक्तजनको ठूलो भीड लागेको छ।

भगवान् शिवको पूजा, आराधना र दर्शनका लागि देशका विभिन्न स्थानबाट आएका श्रद्धालुले पशुपति क्षेत्र भरिभराउ भएको छ।

बिहानैदेखि परेको झरीको समेत प्रवाह नगरी भक्तजनहरू पशुपतिनाथ दर्शनका लागि पुगेका छन्। गेरुवा वस्त्रमा सजिएका हजारौँ श्रद्धालु जल, बेलपत्र तथा विभिन्न पूजा सामग्रीसहित लामबद्ध भएर दर्शनको प्रतीक्षामा छन्।

पशुपति क्षेत्र ‘बोलबम’को नारा, भजन–कीर्तन र धार्मिक गतिविधिले गुञ्जायमान बनेको छ। साउन महिनाको अन्तिम सोमबार भगवान् शिवको पूजा तथा आराधना गर्ने धार्मिक परम्पराअनुसार भक्तजनको संख्या अन्य दिनको तुलनामा उल्लेख्य बढेको हो।

भक्तजनको चापलाई व्यवस्थित गर्न पशुपति क्षेत्र र आसपासमा सुरक्षा व्यवस्था कडा पारिएको छ। मन्दिर प्रवेश, दर्शन तथा भीड व्यवस्थापनका लागि सुरक्षाकर्मी परिचालन गरिएको छ भने भक्तजनलाई सहज रूपमा दर्शन गराउने प्रयास भइरहेको छ।

पशुपतिनाथमा दर्शनार्थीको चाप बढेसँगै गौशाला, तिलगंगा तथा आसपासका सडकमा सवारी आवागमनसमेत प्रभावित भएको छ। सडकमा सवारीको चाप र पैदल यात्रुको संख्या बढेपछि ट्राफिक व्यवस्थापनमा समेत चुनौती देखिएको छ।

साउनको अन्तिम सोमबारलाई विशेष धार्मिक महत्वका साथ मनाउने भएकाले पशुपतिनाथसँगै काठमाडौं उपत्यकाका अन्य शिवालयहरूमा समेत बिहानैदेखि भक्तजनको चहलपहल बढेको छ।

तस्वीरहरू: