पर्सा । पर्सामा १०५ किलो गाँजासहित एक भारतीय नागरिक पक्राउ परेका छन् ।

पक्राउ पर्नेमा भारतको पश्चिम चम्पारण जिल्ला, बेतीया ग्राम उजहरु परजिलवा भांगाहका ५० वर्षीय सउरु चौधरी रहेका छन् ।

लागुऔषध ओसारपसार भइरहेको सूचनाका आधारमा सोमबार राति खटिएको प्रहरी टोलीले उनलाई पटेर्वासुगौली गाउँपालिका–३, सोनवर्षाबाट पक्राउ गरेको हो ।

इलाका प्रहरी कार्यालय पटेर्वा र ठोरीबाट खटिएको संयुक्त प्रहरी टोलीले शंकास्पद रूपमा बोरा बोकेर हिँडिरहेका चौधरीलाई नियन्त्रणमा लिएको थियो । चेकजाँच गर्दा उनले बोकेको बोराभित्र प्लास्टिकबाहेक १०५ किलो गाँजा बरामद भएको प्रहरीले जनाएको छ ।

चौधरीलाई नियन्त्रणमा लिएर थप अनुसन्धान भइरहेको प्रहरीले जनाएको छ ।

यसअघि सोमबार साँझ नै पर्सामा स्रोत नखुलेको ५२ लाख ५० हजार रुपैयाँसहित एक भारतीय र तीन नेपाली नागरिक पक्राउ परेका थिए। पछिल्ला घटनासँगै पर्सामा लागुऔषध तथा अवैध रकम ओसारपसारविरुद्ध प्रहरीले निगरानी बढाएको छ।