काठमाडौं । सत्तारुढ राष्ट्रिय स्वतन्त्र पार्टी (रास्वपा) ले केन्द्रीय समिति बैठक बोलाएको छ। पार्टी सभापति रवि लामिछानेले आगामी भदौ ५ गतेका लागि बैठक आह्वान गरेका हुन्।

रास्वपाका एक पदाधिकारीका अनुसार बैठक शुक्रबार बिहान ११ बजे पार्टीको केन्द्रीय कार्यालयमा बस्नेछ। बैठकमा पार्टीका रिक्त पदाधिकारी तथा केन्द्रीय सदस्यहरू मनोनयन गर्ने प्रस्ताव लैजाने तयारी गरिएको छ।

ती पदाधिकारीका अनुसार सभापति लामिछानेले उपसभापति, महामन्त्री, सहमहामन्त्री, प्रवक्ता, कोषाध्यक्ष, सहकोषाध्यक्ष र सहप्रवक्तासहित विभिन्न पदाधिकारीमा मनोनयनका लागि प्रस्ताव गर्ने तयारी गरेका छन्। साथै पार्टीको सचिवालय विस्तार गर्ने विषयमा पनि बैठकमा छलफल हुने बताइएको छ।

यसअघि साउन १३ गते बसेको रास्वपा केन्द्रीय समिति बैठकले पार्टी संसदीय दलका नेता तथा प्रधानमन्त्री वालेन्द्र शाहलाई वरिष्ठ नेताका रूपमा मनोनयन गरेको थियो। सोही बैठकले पार्टीका पदाधिकारी रहने गरी सचिवालय गठन गर्ने निर्णयसमेत गरेको थियो।

रास्वपामा अझै ५१ जना केन्द्रीय सदस्य मनोनयन गर्न बाँकी रहेको बताइएको छ। आगामी बैठकबाट तीमध्ये केही वा सबै सदस्य मनोनयन गर्ने तयारी रहेको पार्टी स्रोतको भनाइ छ।

केन्द्रीय समिति बैठकसँगै रास्वपाले पार्टीका केन्द्रीय सदस्य तथा सांसदहरूका लागि आवासीय अभिमुखीकरण कार्यक्रमसमेत आयोजना गर्ने भएको छ। भदौ ६ र ७ गते दुई दिन सञ्चालन हुने उक्त कार्यक्रम भदौ ६ गते बिहानदेखि ७ गते साँझसम्म चल्नेछ।

पार्टीले आफ्ना केन्द्रीय सदस्यहरूलाई पठाएको सूचनामा भदौ ५ गते केन्द्रीय समिति बैठक बस्ने र त्यसको भोलिपल्टदेखि आवासीय अभिमुखीकरण कार्यक्रम सञ्चालन हुने जानकारी गराएको छ।

पार्टीको सांगठनिक संरचनालाई पूर्णता दिने, पदाधिकारी चयन गर्ने तथा सचिवालय विस्तार गर्ने विषयमा आगामी बैठकलाई महत्वपूर्ण रूपमा हेरिएको छ। लामो समयदेखि रिक्त रहेका विभिन्न जिम्मेवारीमा मनोनयन भएपछि पार्टीको केन्द्रीय संरचनाले थप पूर्णता पाउने र आगामी राजनीतिक गतिविधिलाई व्यवस्थित रूपमा अघि बढाउन सहज हुने रास्वपा नेताहरूको अपेक्षा छ।