काठमाडौं। राष्ट्रिय स्वतन्त्र पार्टीमा प्रथम महाधिवेशन भएको दुई महिना नपुग्दै सभापति रवि लामिछानेले पार्टीको बाँकी भागबन्डा मिलाउन थालेका छन् ।

शुक्रबार बसेको केन्द्रीय समिति बैठकबाट उनले प्रवक्तादेखि विभागीय प्रमुखसम्म नियुक्त गरे । तर, प्रधानमन्त्री तथा वरिष्ठ नेता बालेन्द्र शाहको भागमा पर्ने भनिएका पद भने अझै खाली छन् ।

रविले पूर्वसञ्चारमन्त्री जगदीश खरेललाई प्रवक्ताको जिम्मेवारी दिएका छन् । पार्टीभित्र रविनिकट मानिएका प्रमोद न्यौपाने र दीपक बोहराको नाम पनि चर्चामा थियो । तर, अन्तिममा दुवैलाई उछिनेर खरेल प्रवक्ता बने ।

असारमा चितवनमा भएको महाधिवेशनमा महामन्त्री बन्ने तयारीसहित उम्मेदवारी दिएका खरेल पछि रविसँगको संवादपछि पछि हटेका थिए । त्यतिबेलैदेखि उनलाई कुनै महत्वपूर्ण जिम्मेवारी दिने चर्चा थियो । अन्ततः प्रवक्ताको कुर्सी उनकै भागमा परेको छ ।

प्रमोद न्यौपानेलाई भने संगठन विभागको जिम्मेवारी दिइएको छ । सांसद नभएका न्यौपानेले जनसंगठनको काम सम्हाल्ने भएका छन् ।

रविले डा. मनोहर प्रधानलाई कोषाध्यक्ष, बसुमाया तामाङलाई सहकोषाध्यक्ष, पुरुषोत्तम यादवलाई सहमहामन्त्री तथा ननिता यादव र सुरेन्द्र चौधरीलाई सहप्रवक्ता बनाएका छन् ।

विभागको जिम्मेवारी बाँडफाँटमा पनि रविले आफ्नो टिमलाई प्राथमिकता दिएका छन् । पूर्वकोषाध्यक्ष लिमा अधिकारीलाई अर्थ विभाग र परराष्ट्रमन्त्री शिशिर खनाललाई अन्तर्राष्ट्रिय सम्बन्ध विभागको जिम्मेवारी दिइएको छ । तोसिमा कार्कीलाई जनस्वास्थ्यसम्बन्धी संगठनको जिम्मेवारी दिइएको छ ।

तर, यत्रो नियुक्तिकाबीच सबैको आँखा बालेन पक्षतिर छ ।

किनभने रास्वपामा अझै एक उपसभापति, एक महामन्त्री र एक सहमहामन्त्री मनोनयन हुन बाँकी छ । अनौपचारिक रूपमा यीमध्ये केही पद बालेन पक्षलाई दिने चर्चा थियो । बालेन पक्षले नाम पठाउनेबित्तिकै ती पदमा नियुक्ति हुने अपेक्षा गरिएको थियो ।

तर नाम आएन ।

नाम नआएपछि रविले आफ्ना मान्छे मिलाउन थाले । बालेनका विश्वासपात्र मानिएका भूपदेव शाह र सुनिल लम्साललाई पदाधिकारी बनाउने चर्चा चलेको थियो । शुक्रबार दुवैलाई केन्द्रीय सदस्यमा मनोनीत गरियो । पदाधिकारीको कुर्सीचाहिँ दिइएन ।

यसलाई संयोग मात्रै मान्ने कि संकेत ? रास्वपाभित्र अहिले यही प्रश्न सर्वत्र उठेको छ ।

बालेन पक्षका नेताहरू पनि अलमलमै छन् । ‘प्रधानमन्त्रीज्यूसँग सभापतिको कुरा भएको थियो, त्यसपछि उहाँहरूले के गर्नुभयो थाहा भएन,’ भन्दै उनीहरू नै चकित परेको बताउँछन् ।

यसअघि साउन २३ गते रविले बालेनलाई भेटेर रिक्त पदाधिकारीका लागि नाम पठाउन आग्रह गरेको बताइन्छ । तर बालेनले नाम नदिएपछि रविले शुक्रबारको बैठकबाट आफ्नै हिसाबले पार्टी संरचना अघि बढाएका हुन् ।

रास्वपाको पहिलो महाधिवेशनमा रवि लामिछाने सभापतिमा निर्विरोध भएका थिए । सोबिता गौतम र डा. स्वर्णिम वाग्ले उपसभापति, विपिनकुमार आचार्य महामन्त्री तथा निशा डाँगी, हरि ढकाल र अशिम शाह सहमहामन्त्री निर्वाचित भएका थिए । बालेनलाई वरिष्ठ नेताका रूपमा अनुमोदन गरिएको थियो ।

महाधिवेशनपछि भने रवि र बालेनबीचको सम्बन्धमा दूरी बढेको चर्चा चल्दै आएको छ । पार्टीका बैठकमा बालेनको उपस्थिति न्यून छ । रविले संगठन विस्तारका काम अघि बढाउँदा बालेन भने धेरैजसो बाहिरै देखिन्छन् ।

शुक्रबार पनि त्यस्तै भयो ।

रास्वपाको केन्द्रीय समिति बैठक वनस्थलीमा चलिरहेका बेला प्रधानमन्त्री बालेन्द्र शाह भने निजी भ्रमण भन्दै मुस्ताङतिर लागे । पार्टी बैठकको दिनै उनले बैठक छल्ने गरी यात्रा रोजेपछि राजनीतिक वृत्तमा अनेक अनुमान सुरु भएका छन् ।

अझ रोचक कुरा के भने, बालेनले आफ्ना पक्षका नेताहरूको नाम पठाएनन् । रविले पनि कुर्दाकुर्दै आफ्ना मान्छे मिलाइदिए ।

अब बाँकी तीन पदमा बालेन पक्षको प्रवेश हुन्छ कि रविले ती कुर्सी पनि आफैं भरिदिन्छन्, हेर्न बाँकी छ । तर शुक्रबारको निर्णयले एउटा कुरा भने प्रस्ट पारेको छ। रविले पार्टीको संगठनात्मक काम बालेनको नाम कुरेर रोकिराख्ने अवस्था अन्त्य गर्न थालेका छन् ।