पाल्पा ।१० वर्षीया बालिकामाथि जबरजस्ती करणी गरेको आरोपमा पाल्पामा १६ वर्षीय किशोर पक्राउ परेका छन्।

जिल्ला प्रहरी कार्यालय पाल्पाका अनुसार गत साउन ५ गते ती किशोरले लिची खान दिने प्रलोभन देखाउँदै बालिकालाई आफ्नो घरमा बोलाएका थिए। बालिकालाई फकाएर घरको गोठमाथिको पहिलो तलामा रहेको कोठामा लगेर जबरजस्ती करणी गरेको आरोपमा प्रहरीले अनुसन्धान अघि बढाएको हो।

घटनाबारे भदौ ४ गते जिल्ला प्रहरी कार्यालय पाल्पामा लिखित जाहेरी परेको थियो। जाहेरीपछि प्रहरी निरीक्षकको कमान्डमा खटिएको टोलीले आरोपित किशोरलाई नियन्त्रणमा लिएको प्रहरीले जनाएको छ।

पक्राउ परेका किशोरलाई पाल्पा जिल्ला अदालतबाट पाँच दिनको म्याद थप गरी घटनाबारे थप अनुसन्धान भइरहेको जिल्ला प्रहरी कार्यालय पाल्पाले जनाएको छ।