काठमाडौं । नेपाली महिलाहरूको महत्वपूर्ण पर्व हरितालिका तीज नजिकिँदै गर्दा तीज लक्षित नयाँ गीत–संगीत सार्वजनिक हुने क्रम बढेको छ। यसै क्रममा चर्चित गायिका भावना आचार्य र लोकप्रिय गायक बद्री पंगेनीको स्वरमा नयाँ तीज गीत ‘सर्लक्कै’ सार्वजनिक गरिएको छ।

‘बग्ने खोला’ लगायतका चर्चित गीतमार्फत दर्शक तथा श्रोतामाझ आफ्नो छुट्टै पहिचान बनाउन सफल गायिका आचार्यले यस वर्षको तीजका लागि ‘सर्लक्कै’ गीत सार्वजनिक गरेकी हुन्। तीजको मौलिकता, रमाइलो वातावरण र नाचगानको भावलाई समेटेर तयार पारिएको गीतले यस वर्षको तीजमा दर्शकलाई मनोरञ्जन दिने अपेक्षा गरिएको छ। गीतको भिडियोमा चर्चित अभिनेत्री पुजन घिमिरे ‘पुकु’, सुरेश देवल र गायिका भावना आचार्य स्वयंको अभिनय रहेको छ। भिडियोमा कलाकारहरूको नृत्य तथा अभिनयलाई आकर्षक ढंगले प्रस्तुत गरिएको छ। तीजको अवसरमा परिवार, साथीभाइ तथा आफन्तसँग रमाइलो गर्दै नाचगान गर्ने वातावरणलाई ध्यानमा राखेर गीत तयार गरिएको बताइएको छ।

‘सर्लक्कै’को भिडियो अभिषेक वाग्ले ‘अबि’ले निर्देशन गरेका हुन्। भिडियोमा गीतको भावअनुसार कलाकारहरूको प्रस्तुति, नृत्य र दृश्य संयोजनलाई प्राथमिकता दिइएको छ। गायिका आचार्यले बद्री पंगेनीसँगको सहकार्यले गीतलाई थप विशेष बनाएको बताएकी छन्।

गायिका आचार्यका अनुसार तीजका अवसरमा हरेक वर्ष नयाँ सांगीतिक कोशेली सार्वजनिक गर्दै आएकी छन्। यस वर्ष पनि दर्शक तथा श्रोताको रुचिलाई ध्यानमा राखेर ‘सर्लक्कै’ तयार पारिएको हो। तीजमा नेपाली दर्शक तथा श्रोतालाई छमछम नचाउने उद्देश्यले गीत सार्वजनिक गरिएको उनको भनाइ छ।

‘बग्ने खोला’बाट व्यापक चर्चा कमाएकी भावना आचार्यका यसअघि ‘मुलको पानी’, ‘चट्ट रातो सारीमा’, ‘टिकटक चलाउने’, ‘उडी उडी आ सुवा’, ‘मलाई दिउँ दिउँ झैँ लाग्ने’, ‘खानी भातै हो’ र ‘जानी घाटै हो’ लगायतका गीत सार्वजनिक भइसकेका छन्। उनका गीतहरूमा तीज तथा नेपाली मौलिक सांगीतिक स्वादलाई प्राथमिकता दिइएको पाइन्छ।

गायनसँगै नृत्यमा समेत रुचि राख्ने भावना आचार्य आफ्ना गीतका भिडियोमा आफैं पनि प्रस्तुत हुँदै आएकी छन्। उनको नृत्यलाई दर्शकले रुचाउँदै आएका कारण ‘सर्लक्कै’को भिडियोमा पनि उनको नृत्य तथा अभिनयलाई विशेष आकर्षणका रूपमा प्रस्तुत गरिएको छ।

यता, नेपाली तीज गीतमा लामो समयदेखि सक्रिय बद्री पंगेनीको सहभागिताले ‘सर्लक्कै’लाई थप चर्चामा ल्याएको छ। बद्री पंगेनीका तीज तथा लोकदोहोरीका गीतहरू नेपाली संगीतप्रेमीमाझ लोकप्रिय छन्। भावना आचार्य र बद्री पंगेनीको स्वर संयोजनले गीतमा नयाँपन थप्ने प्रयास गरिएको छ।

गीत तथा भिडियो गायिका भावना आचार्यकै आधिकारिक च्यानलमार्फत बजारमा ल्याइएको हो। सार्वजनिक भएसँगै गीतले सामाजिक सञ्जाल तथा डिजिटल प्लेटफर्ममा दर्शकको ध्यान तान्न थालेको छ। तीजको माहोल सुरु भएसँगै बजारमा विभिन्न नयाँ गीत सार्वजनिक भइरहेका बेला ‘सर्लक्कै’ पनि यस वर्षको तीजको सांगीतिक सूचीमा थपिएको छ। आकर्षक भिडियो, चर्चित कलाकारको अभिनय तथा भावना आचार्य र बद्री पंगेनीको स्वरका कारण गीतले तीजका कार्यक्रममा समेत राम्रो स्थान पाउने अपेक्षा गरिएको छ।