चितवन । रसुवा क्षेत्रमा आएको ठूलो बाढी त्रिशूली हुँदै चितवनतर्फ आउने क्रम सुरु भएपछि जिल्ला प्रशासन कार्यालयले उच्च सतर्कता अपनाएको छ। माथिल्लो तटीय क्षेत्रमा बाढीले पुर्‍याएको क्षतिको अवस्थालाई मध्यनजर गर्दै चितवनमा पनि ठूलो जोखिम हुन सक्ने भन्दै प्रशासनले सुरक्षा तयारी तीव्र बनाएको हो।

प्रमुख जिल्ला अधिकारी गणेश अर्यालका अनुसार त्रिशूली र नारायणी नदीको बहाव बढ्दो क्रममा रहेकाले नदी तटीय क्षेत्रका बासिन्दालाई सुरक्षित स्थानमा सार्न थालिएको छ।

‘माथि जुन तहको क्षति भएको छ, त्यसैका आधारमा चितवन पनि प्रभावित हुन सक्छ भन्ने हाम्रो विश्लेषण छ। त्यसैले नदी तटीय क्षेत्रका बासिन्दालाई सुरक्षित स्थानमा सार्ने काम गरिसकेका छौँ,’ प्रजिअ अर्यालले भने।

प्रशासनले स्थानीय तहसँग समन्वय गरेर जोखिमयुक्त क्षेत्रमा माइकिङ गरी सर्वसाधारणलाई सतर्क गराइरहेको छ। विशेषगरी फिस्लिङदेखि गोलाघाटसम्मका त्रिशूली र नारायणी नदी किनारका बस्तीलाई उच्च जोखिममा राखिएको छ।

प्रशासनका अनुसार मुग्लिन बजार क्षेत्र, नारायणगढको नारायणी नदी किनार, भरतपुर महानगरपालिका–१६ को तटीय क्षेत्र तथा पश्चिम चितवनका तल्लो भूभाग बाढीको उच्च जोखिममा छन्।

नदीको बहाव अझै बढ्न सक्ने सम्भावना रहेकाले सुरक्षा निकायका सबै टोलीलाई ‘हाई अलर्ट’मा राखिएको छ। सम्भावित जोखिममा उद्धार तथा राहतका लागि सुरक्षाकर्मीलाई फिल्डमै परिचालन गरिएको प्रशासनले जनाएको छ।

‘हाम्रो मुख्य प्राथमिकता मानवीय क्षति हुन नदिने हो,’ प्रजिअ अर्यालले भने, ‘नदीको बहाव बढ्ने क्रममा रहेकाले आवश्यक सबै तयारी पूरा गरिएको छ।’

माथिल्लो क्षेत्रमा भइरहेको अविरल वर्षा र त्यसबाट आएको बाढीका कारण त्रिशूली तथा नारायणी नदीको बहाव थप बढ्न सक्ने भएकाले नदी किनारका बासिन्दालाई सचेत रहन, सुरक्षित स्थानमा बस्न र प्रशासनको सूचनालाई पालना गर्न आग्रह गरिएको छ।

रसुवामा बाढीले ठूलो क्षति पुर्‍याएपछि त्यसको प्रभाव तल्लो तटीय क्षेत्रमा समेत पर्न सक्ने भएकाले चितवन प्रशासनले अहिले नै सम्भावित जोखिम नियन्त्रण र मानवीय क्षति रोक्ने तयारीलाई प्राथमिकतामा राखेको छ।