काठमाडौं । भोटेकोशी नदीमा आएको भीषण बाढीपछि जलविद्युत् आयोजनामा कार्यरत डडेल्धुराका नौ जना कामदार सम्पर्कविहीन भएका छन्।

सम्पर्कविहीन हुनेमा आलिताल गाउँपालिका–३ कान्तिपुरका उमेश बुढा, लक्ष्मण रामजाली, गौरव रामजाली, गोविन्द रामजाली, सुन्दर बुढामगर र दिनेश रामजाली तथा आलिताल–७ नाउलीका दीपक घर्तीमगर, राजेश घर्तीमगर र किरण घर्तीमगर छन्।

उनीहरूसँगै काम गर्ने स्थानीय सुनील बुढामगरका अनुसार आलिताल–३ बाट आयोजनामा पुगेका ६ जना र वडा नम्बर ७ का तीन जना गरी नौ जना सम्पर्कविहीन भएका हुन्।

सुनीलका बुबा तथा आलिताल–३ का वडाध्यक्ष बलबहादुर बुढामगरका अनुसार सुनील बुधबार काममा नगएकाले आफू सुरक्षित रहेको जानकारी दिएका थिए। तर, अहिले उनीसँग समेत सम्पर्क हुन नसकेको उनले बताएका छन्।

बाढीपछि सम्पर्कविहीन कामदारको अवस्थाबारे थप विवरण आउन बाँकी छ।