काठमाडौं । रसुवा, नुवाकोट र आसपासका क्षेत्रमा आएको विनाशकारी बाढीप्रति नेपालस्थित सात विदेशी कूटनीतिक नियोगले गहिरो दुःख व्यक्त गरेका छन् ।

अस्ट्रेलिया, युरोपेली युनियन, फिनल्यान्ड, फ्रान्स, नर्वे, स्विट्जरल्यान्ड र बेलायतका दूतावासले संयुक्त वक्तव्य जारी गर्दै विपद्मा परी प्रभावित भएका सबै नेपालीप्रति सहानुभूति प्रकट गरेका हुन् ।

संयुक्त वक्तव्यमा कठिन परिस्थितिमा नेपाली जनतासँग पूर्ण ऐक्यबद्धता रहेको उल्लेख गरिएको छ । बाढीबाट भएको जनधनको क्षतिप्रति दुःख व्यक्त गर्दै प्रभावित परिवारप्रति कूटनीतिक नियोगहरूले समवेदना प्रकट गरेका छन् ।

विपद्को अवस्था अझै विकसित भइरहेकाले प्रभावित क्षेत्रका बासिन्दालाई स्थानीय प्रशासनले जारी गरेका निर्देशन तथा आधिकारिक सुरक्षा सूचनाको पालना गर्न उनीहरूले आग्रह गरेका छन् ।

साथै, जोखिमयुक्त क्षेत्रमा अनावश्यक आवतजावत नगर्न र सुरक्षा निकाय तथा स्थानीय अधिकारीले दिएका निर्देशनअनुसार सुरक्षित रहन पनि नियोगहरूले अपिल गरेका छन् ।