काठमाडौं। रसुवाको भोटेकोशी हुँदै त्रिशूली र नारायणी नदीमा आएको बाढीपछि खोज तथा उद्धारका लागि १ हजार ५०० भन्दा बढी सशस्त्र प्रहरी परिचालन गरिएको छ।

बाढी प्रभावित क्षेत्रमा विपद् प्रतिकार्य बेस स्थापना गरेर दक्ष उद्धार टोली र गोताखोरसमेत खटाइएको सशस्त्र प्रहरीले जनाएको छ। टोलीले भत्किएका संरचना, जलविद्युत् आयोजना तथा अन्य जोखिमयुक्त क्षेत्रमा बेपत्ता भएकाहरूको खोजी गरिरहेको छ।

उद्धारमा तालिमप्राप्त कुकुर र ६ वटा ड्रोनसमेत प्रयोग गरिएको छ। सशस्त्र प्रहरीका सहप्रवक्ता शैलेन्द्र थापाका अनुसार हालसम्म १२ स्थानमा खोजी गर्दा ९८ शव फेला परेका छन् भने ३० घाइतेसहित ७३ जनाको सकुशल उद्धार गरिएको छ।

बाढी प्रभावित घाइतेका लागि नुवाकोटमा चिकित्सकसहितको स्वास्थ्य टोली परिचालन गरी स्वास्थ्य शिविर सञ्चालन गरिएको छ। तत्काल उपचार आवश्यक पर्नेहरूका लागि नेपाल एपीएफ अस्पतालमा १०० शय्या तयारी अवस्थामा राखिएको छ।

त्यस्तै, सशस्त्र प्रहरीको विपद् व्यवस्थापन तालिम शिक्षालय कुरिनटारबाट १०० शय्या क्षमताको कन्टेनर प्रभावित क्षेत्रमा पठाउने काम भइरहेको छ।

अन्य स्थानमा रहेका कन्टेनरसमेत प्रभावित क्षेत्रमा केन्द्रित गरेर परिचालन गरिएको सशस्त्र प्रहरीले जनाएको छ।