काठमाडौं । काठमाडौं महानगरपालिकाकी कार्यवाहक प्रमुख सुनिता डङ्गोलले भोटेकोशी बाढीबाट प्रभावित नागरिकको उद्धार र राहतका लागि राज्यका सबै निकाय तथा आम नागरिकलाई एकजुट भएर अघि बढ्न आग्रह गरेकी छन्।

विपत्तिले ठूलो मानवीय क्षति पुर्‍याएको भन्दै डङ्गोलले उद्धारको प्रतीक्षामा रहेका नागरिकलाई सुरक्षित स्थानमा लैजानु, विस्थापित परिवारको तत्काल व्यवस्थापन गर्नु र प्रभावितमा बढेको त्रास कम गर्नु अहिलेको मुख्य आवश्यकता रहेको बताएकी छन्।

उनका अनुसार विपद् व्यवस्थापन कुनै एक निकायको मात्र जिम्मेवारी नभएकाले संघ, प्रदेश र स्थानीय सरकारसँगै सुरक्षा निकाय, जनप्रतिनिधि, सामाजिक संघसंस्था, निजी क्षेत्र र सर्वसाधारणबीच प्रभावकारी सहकार्य आवश्यक छ।

डङ्गोलले संकटका बेला हरेक नागरिकले आफ्नो क्षमताअनुसार सहयोग गर्न सक्ने बताएकी छन्। उद्धारमा प्रत्यक्ष सहभागी हुनेदेखि खाद्यान्न तथा आवश्यक सामग्री उपलब्ध गराउने, यातायातको व्यवस्था मिलाउने र स्वास्थ्य सेवामा सहयोग गर्ने कामबाट पनि प्रभावितको जीवन सहज बनाउन सकिने उनको भनाइ छ।

‘विपत्तिलाई केवल समाचारका रूपमा हेरेर बस्ने समय होइन। हाम्रो सानो प्रयासले पनि कसैको जीवन जोगिन सक्छ,’ डङ्गोलले भनेकी छन्।

बाढी प्रभावित क्षेत्रका नागरिकलाई थप जोखिमबाट जोगिन सचेत रहन तथा स्थानीय प्रशासन र सुरक्षा निकायले जारी गरेका निर्देशन पालना गर्न उनले आग्रह गरेकी छन्।

भौगोलिक दूरीले प्रभावित क्षेत्र अलग भए पनि संकटको समयमा मानवीय सम्बन्धले सबैलाई जोड्ने उल्लेख गर्दै डङ्गोलले विपत्तिमा परेका नागरिकलाई एक्लो महसुस हुन नदिन सबै नेपाली एकजुट हुनुपर्ने बताएकी छन्।

काठमाडौं महानगरपालिका प्रभावित नागरिकको उद्धार, राहत र पुनःस्थापनाका लागि आवश्यक सहयोग गर्न तयार रहेको जनाउँदै उनले संकटको यो घडीमा जीवन जोगाउने अभियानलाई प्रभावकारी बनाउन सबै पक्षबीच सहकार्य आवश्यक रहेको बताएकी छन्।