काठमाडौं। नेपाल-चीन सीमापारि तिब्बतमा पहिरोका कारण थुनिएर बनेको कृत्रिम ताल पुनः फुटेपछि आएको बाढीको बहाव रसुवाको स्याफ्रुबेँसीसम्म आइपुगेको छ।

अचानक पानीको बहाव बढेपछि भोटेकोशी र त्रिशूली नदी आसपासका बस्तीमा फेरि जोखिम बढेको छ।

बाढी पूर्वानुमान महाशाखाले पानीको बहावले त्रिशूली नदीको तटीय क्षेत्रमा समेत असर पार्न सक्ने भन्दै मुग्लिनसम्मका नदी किनारमा रहेका नागरिकलाई उच्च सतर्कता अपनाउन आग्रह गरेको छ। नदीको सतह र बहावमा अचानक परिवर्तन आउन सक्ने भएकाले जोखिमयुक्त क्षेत्रमा नजान तथा सुरक्षित स्थानमा रहन महाशाखाले अनुरोध गरेको छ।

तिब्बतको जिरोङ नाकाभन्दा माथिल्लो क्षेत्रमा पहिरोका कारण नदी थुनिएर बनेको तालमा पानीको मात्रा बढेपछि त्यसबाट ठूलो परिमाणमा पानी बाहिरिएको बताइएको छ। ताल फुटेसँगै पानी तीव्र गतिमा नेपालतर्फ बग्न थालेपछि स्याफ्रुबेँसीसहित भोटेकोशी नदी आसपासका क्षेत्रमा यसको प्रभाव देखिएको हो।

यसअघि भदौ १० गते आएको विनाशकारी बाढीले रसुवासहित नुवाकोट, धादिङ, गोरखा, तनहुँ, चितवनलगायत जिल्लामा ठूलो जनधनको क्षति गरेको थियो। सोही विपद्पछि तिब्बततर्फ ल्हेन्दे खोला पहिरोले थुनिँदा कृत्रिम ताल बनेको थियो। उक्त तालमा पानीको सतह बढ्दै गएपछि पुनः फुट्न सक्ने जोखिमबारे नेपाली पक्षलाई सचेत गराइएको थियो।

दोस्रोपटक ठूलो पानीको बहाव नेपालतर्फ आउन थालेपछि स्थानीय प्रशासन र सुरक्षा निकायले नदी आसपासको अवस्थालाई नजिकबाट निगरानी गरिरहेका छन्। यसअघि नै प्रहरीले भोटेकोशी र त्रिशूली नदी किनार तथा अन्य जोखिमयुक्त क्षेत्रमा रहेका नागरिकलाई तत्काल सुरक्षित स्थानतर्फ सर्न आपत्कालीन सूचना जारी गरेको थियो।

प्रशासनले नदीको बहाव बढिरहेको अवस्थामा नदी किनारमा जाने, पुल तथा जोखिमपूर्ण स्थानमा उभिने वा अनावश्यक आवतजावत नगर्न आग्रह गरेको छ। सम्भावित जोखिमलाई ध्यानमा राख्दै स्थानीय तह, सुरक्षा निकाय र विपद् व्यवस्थापनसँग सम्बन्धित निकायलाई आवश्यक तयारी अवस्थामा राखिएको छ।

पहिलो बाढीबाट प्रभावित क्षेत्र पूर्ण रूपमा सामान्य अवस्थामा फर्किन नपाउँदै पुनः बाढीको जोखिम बढेपछि स्थानीय बासिन्दामा त्रास थपिएको छ।

विशेषगरी भोटेकोशी र त्रिशूली नदीको तटीय क्षेत्रमा रहेका बस्ती तथा संरचनामा थप क्षति हुन सक्ने भएकाले नागरिकलाई आधिकारिक सूचना पछ्याउन आग्रह गरिएको छ।