काठमाडौं । रसुवास्थित त्रिशूली–३ ‘ए’ जलविद्युत् आयोजनाको सुरुङमा फसेका भनिएका नागरिकको उद्धारका लागि सुरक्षाकर्मीले प्रयास तीव्र पारेका छन्।

शनिबार बिहानैदेखि सुरुङको प्रवेशद्वारमा थुप्रिएको लेदो तथा भग्नावशेष हटाएर भित्र पस्ने बाटो खोल्ने कामलाई तीव्रता दिइएको हो।

उद्धारका लागि नेपाली सेनाका ६२ तथा नेपाल प्रहरी र सशस्त्र प्रहरीका २० गरी ८२ जनाको संयुक्त टोली शुक्रबार रातिदेखि नै घटनास्थलमा निरन्तर खटिएको छ।

प्रतिकूल मौसमका कारण उद्धार कार्यमा चुनौती थपिएको छ। त्यसका बाबजुद सुरुङभित्र पुगेर सम्भावित रूपमा फसेकाहरूको खोजी गर्ने प्रयास जारी रहेको छ।

यसैबीच, उद्धारमा सहयोग गर्न भारतबाट आएको विशेषज्ञ टोली पनि त्रिशूली पुगेको छ।

टोलीले हेलिकप्टरमार्फत चिलिमे र लाङटाङ क्षेत्रमा प्रारम्भिक निरीक्षण गरी आवश्यकताअनुसार उद्धार अभियान अघि बढाउने तयारी गरेको छ।