चितवन। भोटेकोशीमा आएको भीषण बाढीपछि नारायणी नदीमा भेटिएका पहिचान नखुलेका शव जंगलमा गाडेर व्यवस्थापन गरिने भएको छ ।

चितवनमा भेटिएका सडेगलेका तथा बेवारिसे शवको पहिचानका लागि ट्याग लगाउने र डीएनए नमुना संकलन गर्ने कामसँगै सुरक्षित व्यवस्थापनको तयारी गरिएको हो ।

संक्रमण तथा महामारी फैलिन सक्ने जोखिमलाई ध्यानमा राख्दै शव व्यवस्थापन गर्न लागिएको चितवनका प्रमुख जिल्ला अधिकारी गणेश अर्यालले जानकारी दिए ।

उनका अनुसार भरतपुर महानगरपालिका–१ अन्तर्गत रामनगर–देवघाट सडकखण्ड नजिकको जंगलमा शव गाडिनेछ । त्यसका लागि सुरक्षाकर्मीको उपस्थितिमा दुईवटा डोजर प्रयोग गरी जंगलको बीच भागमा खाल्डोसमेत तयार पारिएको छ ।

चितवनमा बाढीपछि अहिलेसम्म २ सय ३३ शव फेला परेका छन् । तीमध्ये हालसम्म ६ वटा शवको मात्र पहिचान खुलेको जनाइएको छ।