काठमाडौं । भोटेकोशीको बाढीले पृथ्वी राजमार्गसँग धादिङबेँसी जोड्ने पुल बगाएपछि तीन दिनदेखि सडक सम्पर्कविहीन बनेको धादिङ सदरमुकाम फेरि सडक सञ्जालमा जोडिएको छ।

बाढीले मुख्य पुल नै बगाएपछि धादिङबेँसीसँगको सडक कनेक्सन टुटेको थियो। त्यसपछि सरकारले वैकल्पिक सडक सञ्चालनमा ल्याएर सदरमुकामसम्मको आवागमन जोडेको हो।

शनिबारदेखि परेवाटार–नेपालटार–गजुरीटार–पिपलटार–आदमटार–बेलिनटार–केउरिनीटार हुँदै मास्टारस्थित ह्याम्लेट रेष्टुरेन्टसम्मको सडक सञ्चालनमा आएको पूर्वाधार विकास मन्त्रालयले जनाएको छ।

वैकल्पिक सडक खुलेसँगै तीन दिनदेखि सडक सम्पर्कविहीन बनेको धादिङबेँसीमा अब राहत, उद्धार तथा अत्यावश्यक सामग्री पुर्‍याउन सहज हुने अपेक्षा गरिएको छ।

भोटेकोशी बाढीका कारण धादिङका विभिन्न स्थानमा सडक तथा पुलमा ठूलो क्षति पुगेपछि प्रभावित क्षेत्रको आवागमन अझै चुनौतीपूर्ण रहेको छ।