काठमाडौं। सत्तारुढ राष्ट्रिय स्वतन्त्र पार्टी (रास्वपा)ले विपत्तिका कारण नेपाल शोकमा रहे पनि देश पूर्ण रूपमा बन्द नरहेको जनाएको छ।

बुधबार प्रतिनिधिसभाको बैठकमा बोल्दै रास्वपाका संसदीय दलका उपनेता गणेश पराजुलीले विपत्तिको कठिन परिस्थितिबीच पनि नेपालले विश्व समुदायलाई स्वागत गर्ने वातावरण कायम राखेको बताए।

उनले सुरक्षित गन्तव्यबारे सम्बन्धित निकायबाट प्राप्त आधिकारिक तथा अद्यावधिक सूचना लिएर विदेशी पर्यटकलाई नेपाल भ्रमण जारी राख्न आग्रह गरे। पर्यटन क्षेत्रलाई चलायमान राख्नु अहिलेको अवस्थामा नेपालको पुनरुत्थानमा विश्व समुदायले गर्न सक्ने महत्वपूर्ण सहयोग हुने उनको भनाइ थियो।

पराजुलीले नेपालले अन्तर्राष्ट्रिय समुदायसँग केवल सहानुभूति नभई जलवायु परिवर्तनबाट परेको असमान क्षतिको न्यायसमेत मागिरहेको बताए। जलवायु संकट सिर्जनामा नेपालको भूमिका न्यून भए पनि त्यसको ठूलो मूल्य नेपाली नागरिकले चुकाइरहेको उनले उल्लेख गरे।