काठमाडौं। गृहमन्त्री सुधन गुरुङले जेनजी आन्दोलनलाई लिएर पुराना राजनीतिक दलका नेताहरूले गरिरहेका टिप्पणीप्रति आपत्ति जनाएका छन्। उनले आन्दोलनको इतिहासलाई तोडमोड गर्ने वा अवमूल्यन गर्ने प्रयास नगर्न पुराना दलका नेताहरूलाई चेतावनी दिएका छन्।

जेनजी शहीद दिवसका अवसरमा आयोजित कार्यक्रममा बोल्दै गुरुङले भदौ २३ गतेको आन्दोलनलाई सामान्य घटनाका रूपमा नलिन आग्रह गरे। आन्दोलनमाथि प्रश्न उठाउनु वा त्यसलाई अपमान गर्नु देशका नागरिकको भावनामाथि नै प्रहार भएको उनको भनाइ थियो।

उनले पुरानो राजनीतिक सोचबाट नयाँ नेपाल निर्माण सम्भव नहुने भन्दै दलका नेताहरूलाई समयमै आफूलाई सुधार्न सुझाव दिए। जनताले परिवर्तनका लागि आफूहरूलाई जिम्मेवारी दिएको उल्लेख गर्दै गुरुङले आफूहरू सत्ता र शक्तिको मोहमा नभएको दाबी गरे।

गृहमन्त्री गुरुङले जिम्मेवारीमा रहँदा आफूबाट कुनै कमजोरी नहोस् भन्ने विषयमा सधैँ सचेत रहने गरेको बताए। सरकारले जेनजी आन्दोलनका क्रममा उठाइएका मागलाई सम्बोधन गर्दै सुशासन र सुधारका पक्षमा काम गरिरहेको उनको दाबी थियो।

उनले विगतमा सुशासन र परिवर्तनको माग गर्दै सडकमा उत्रिएका युवामाथि तत्कालीन सरकारले गोली चलाएको आरोपसमेत लगाए।

गुरुङले आफूलाई सुशासन कायम गर्ने जिम्मेवारी दिएको भन्दै राष्ट्रिय स्वतन्त्र पार्टीका सभापति रवि लामिछाने र प्रधानमन्त्री बालेन्द्र शाहप्रति आभार व्यक्त गरे। आफूले लामिछानेसँग आवश्यक विषयमा निरन्तर परामर्श गरिरहेको पनि उनले बताए।