काठमाडौं। विपद्का बेला ठूलो संख्यामा शव फेला पर्दा व्यवस्थापनमा हुने समस्या समाधान गर्न सरकारले देशका १२ वटा संघीय अस्पताल तथा स्वास्थ्य विज्ञान प्रतिष्ठानमा ठूलो क्षमताका शवगृह बनाउने भएको छ ।

स्वास्थ्य तथा खाद्य स्वच्छता मन्त्रालयले प्रत्येक अस्पतालमा एकैपटक कम्तीमा ५० शव राख्न सकिने क्षमताको शवगृह निर्माण वा क्षमता विस्तारको योजना अघि सारेको हो ।

मन्त्रालयका अनुसार कोशी, नारायणी, गजेन्द्रनारायण सिंह, भरतपुर, भेरी र डडेलधुरा अस्पतालमा शवगृह निर्माण तथा क्षमता विस्तारको प्रक्रिया अघि बढाइनेछ ।

त्यस्तै, चिकित्सा विज्ञान राष्ट्रिय प्रतिष्ठान, बीपी कोइराला स्वास्थ्य विज्ञान प्रतिष्ठान, पाटन, पोखरा, राप्ती र कर्णाली स्वास्थ्य विज्ञान प्रतिष्ठानमा पनि कम्तीमा ५० शव व्यवस्थापन गर्न सक्ने क्षमताको शवगृह बनाइनेछ ।

स्वास्थ्य तथा खाद्य स्वच्छतामन्त्री निशा मेहताले विगतका विपद्का क्रममा शव व्यवस्थापनमा देखिएको कठिनाइ र पछिल्लो भोटेकोशी बाढीपछि उत्पन्न अवस्थाले अस्पतालमा यस्तो पूर्वाधारको आवश्यकता झन् स्पष्ट पारेको बताएकी छन् ।

उनका अनुसार विपद् आउँदा शव व्यवस्थापनका लागि तत्काल पर्याप्त संरचना नहुँदा समस्या थपिने गरेको छ । विगतका घटनाबाट सिकेर भविष्यमा त्यस्तो अवस्था दोहोरिन नदिन अस्पतालमै पर्याप्त क्षमताको शवगृह आवश्यक रहेको उनको भनाइ छ ।

मन्त्रालयले शवगृह विस्तारसँगै फरेन्सिक मेडिसिन तथा मेडिको-लिगल सेवा प्रभावकारी बनाउने तयारीसमेत गरेको छ । विपद्का बेला शवको सुरक्षित संरक्षण, पहिचान र वैज्ञानिक परीक्षणका लागि यस्ता संरचना महत्वपूर्ण हुने मन्त्रालयको निष्कर्ष छ ।

विपद् पूर्वतयारीलाई बलियो बनाउने उद्देश्यले अघि सारिएको यो योजनाले ठूलो संख्यामा मृत्यु हुने प्राकृतिक विपत्ति वा अन्य घटनामा शव व्यवस्थापनलाई सुरक्षित, व्यवस्थित र मर्यादित बनाउन सहयोग पुग्ने अपेक्षा गरिएको छ ।