काठमाडौं । राष्ट्रिय स्वतन्त्र पार्टी (रास्वपा) का सांसद खगेन्द्र कर्णले सप्तरीको राजविराजस्थित गजेन्द्रनारायण सिंह अस्पतालमा रकम अभावका कारण एक सुत्केरी महिलाले अस्पतालबाहिरै शिशु जन्माउनुपरेको भन्दै सरकारको ध्यानाकर्षण गराएका छन् ।

प्रतिनिधिसभाको बैठकमा बोल्दै सांसद कर्णले राजविराज-१४, प्रसाही टोलका हरेराम पासवानकी श्रीमती बबिता पासवानले अस्पतालको गेटबाहिरै शिशु जन्माउनुपरेको घटना अत्यन्तै संवेदनशील र गम्भीर भएको बताए ।

उनका अनुसार प्रसव पीडामा रहेकी बबिता उपचारका लागि गजेन्द्रनारायण सिंह अस्पताल पुगेकी थिइन् । अस्पताल प्रशासनले ३ हजार २ सय रुपैयाँको बिल तिर्न भनेपछि उनले आफूसँग २ हजार ५ सय रुपैयाँ मात्रै रहेको जानकारी गराएकी थिइन् ।

७ सय रुपैयाँ अपुग भएपछि अस्पताल प्रशासनले उपचारमा आनाकानी गरेको र त्यसपछि उनले अस्पताल परिसरबाहिरै शिशु जन्माउनुपरेको कर्णले बताए ।

‘महिला प्रसव पीडामा थिइन् र बच्चाको जन्म अस्पताल कम्पाउन्ड बाहिर नै भयो,’ उनले भने ।

सांसद कर्णले गजेन्द्रनारायण सिंह अस्पताल सप्तरीका गरिब, विपन्न, असहाय तथा निम्न आय भएका नागरिकको स्वास्थ्य उपचारको भरोसा केन्द्र भए पनि आर्थिक अभावकै कारण सुत्केरीले अस्पतालबाहिर बच्चा जन्माउनुपर्ने अवस्था आउनु दुःखद् भएको बताए ।

उनले घटनाले नेपालको स्वास्थ्य प्रणालीमा रहेका कमजोरीलाई उजागर गरेको भन्दै गरिब, पीडित तथा दलित महिलाले स्वास्थ्य सेवामा भोग्नुपरेका समस्याप्रति सरकार गम्भीर हुनुपर्ने बताए ।

‘एउटी महिला पैसाको अभावमा अस्पतालबाहिर आफ्ना बच्चा जन्माउनुपर्ने अवस्था आएको छ । हामी भने स्वास्थ्यमा ठूला-ठूला कुरा गरेर बसिरहेका छौँ,’ कर्णले भने ।

उनले सप्तरीमा भएको घटनाको सत्यतथ्य छानबिन गरी त्यसको विवरण संसद्मा जानकारी गराउन स्वास्थ्य तथा जनसंख्या मन्त्रीको ध्यानाकर्षण गराए।