काठमाडौं । उद्योगमन्त्री गौरीकुमारी यादवले राजीनामा दिएको केही समयमै राष्ट्रिय स्वतन्त्र पार्टी (रास्वपा) का सांसद हरिमोहन भण्डारीले संसदीय समितिको सदस्य पदबाट अलग हुने घोषणा गरेका छन् ।

बिहीबार प्रतिनिधिसभाको बैठकमा बोल्दै भण्डारीले उद्योग तथा वाणिज्य र श्रम तथा उपभोक्ता हित समितिको सदस्यबाट राजीनामा दिने बताएका हुन् ।

देशभर खाना पकाउने ग्यासको अभाव चर्किएको अवस्थामा उपभोक्ता हित हेर्ने समितिमा बसेर काम गरिरहन आफूलाई नैतिक रूपमा उचित नलागेको उनले बताए ।

‘जनताले खाना पकाउने ग्याससमेत सहज रूपमा पाउन सकेका छैनन् । यस्तो गम्भीर अवस्थामा उपभोक्ताको हित हेर्ने समितिमा बसेर काम गर्ने नैतिकता मैले देखिनँ,’ भण्डारीले भने ।

उनले ग्यासलगायत उपभोक्तासँग प्रत्यक्ष सरोकार राख्ने विषयमा सरकार र सम्बन्धित निकायले प्रभावकारी कदम चाल्न नसकेको भन्दै असन्तुष्टि जनाए ।

नागरिकले दैनिक उपभोगकै वस्तु पाउन सास्ती खेपिरहेका बेला समस्या समाधानका लागि ठोस पहल गर्न नसक्ने समितिमा बसिरहनुभन्दा त्यसबाट अलग हुनु उपयुक्त हुने उनको भनाइ थियो ।

उद्योगमन्त्री यादवले इन्धन आपूर्ति व्यवस्थापनको विषयमा आलोचना र विवादबीच बिहीबार नै पदबाट राजीनामा दिएकी थिइन् ।