काठमाडौं। रास्वपा सांसद डा. अमरेशकुमार सिंहले प्रधानमन्त्री बालेन्द्र शाह नेतृत्वको सरकारलाई ‘तासको पत्ता’को संज्ञा दिँदै मधेसीमाथि विभेद जारी रहे सरकार टिक्न नसक्ने चेतावनी दिएका छन् ।

बिहीबार प्रतिनिधिसभाको बैठकमा बोल्दै सिंहले सरकार गठन भएदेखि नै मधेसीमाथि प्रहार भइरहेको आरोप लगाए ।

उनले मधेसी महिला बबिता पासवानले अस्पतालमा उपचार तथा बस्ने ठाउँ नपाउँदा अस्पतालबाहिरै सुत्केरी हुनुपरेको प्रसंग उठाउँदै राज्यको व्यवहारप्रति आक्रोश पोखे ।

‘बिहानै मेरो घरमा भोला पासवान आउनुभएको थियो । उहाँले बबिता पासवानको भिडियो देखाउनुभयो । यो राज्य मधेसीप्रति कति पीडादायी छ ?’ सिंहले प्रश्न गरे ।

बबिताको अवस्थाको भिडियो हेर्दा आफू भावुक भएको बताउँदै उनले प्रधानमन्त्री शाहलाई मधेसीको समर्थनमा बनेको सरकार भएको स्मरण गराए ।

‘म यहाँ रुँदिनँ । म राज्यलाई भन्न चाहन्छु -तपाईं मधेसीको बलमा सरकार ठड्याउनुभएको छ, तपाईंको यो सरकार तासको पत्ता हो,’ सिंहले भने ।

सरकारले मधेसीलाई सुरुदेखि नै बेवास्ता गरेको आरोप लगाउँदै उनले बर्दिबास मेडिकल कलेज बनाउने सपना समेत अलपत्र पारिएको बताए । दीपककुमार साहको बर्खास्तीदेखि गौरीकुमारी यादवको राजीनामासम्मका घटनालाई जोड्दै उनले सरकारको कार्यशैलीमाथि प्रश्न उठाए ।

सिंहले आफू गुटको राजनीतिमा विश्वास नगर्ने दाबी गर्दै प्रधानमन्त्रीका सल्लाहकारमाथि राज्यको स्रोतसाधन दुरुपयोग गरेको आरोपसमेत लगाए ।

रसुवा बाढीपछि उद्धारमा भएको ढिलाइ, किसानले मल नपाएको अवस्था तथा शिक्षा र स्वास्थ्य क्षेत्रमा देखिएका समस्यालाई लिएर पनि उनले सरकारको आलोचना गरे ।

न्यायालय र कर्मचारीतन्त्रसमेत अस्तव्यस्त रहेको दाबी गर्दै सिंहले प्रधानमन्त्रीको सचिवालय र सल्लाहकारकै कार्यशैलीका कारण सरकार असफलतातर्फ उन्मुख भएको आरोप लगाए ।