काठमाडौं। प्रधानमन्त्री बालेन्द्र शाह नेतृत्वको सरकारले उद्योग, वाणिज्य तथा आपूर्ति मन्त्रालयको जिम्मेवारी दीपककुमार साहलाई दिने तयारी गरेको छ।

प्रधानमन्त्री शाहको सचिवालयका अनुसार सुनसरी-४ बाट निर्वाचित सांसद साहलाई उद्योगमन्त्री बनाउने तयारी गरिएको हो। उद्योगमन्त्री गौरीकुमारी यादवले पदबाट राजीनामा दिएपछि रिक्त रहेको मन्त्रालयमा साहलाई जिम्मेवारी दिने तयारी भएको सचिवालयले जनाएको छ।

यादवले राजीनामा दिएपछि उद्योग, वाणिज्य तथा आपूर्ति मन्त्रालय केही समयदेखि मन्त्रीविहीन बनेको थियो। मन्त्रालयको नेतृत्व खाली भएपछि नयाँ मन्त्री नियुक्तिका लागि प्रधानमन्त्री शाहले पार्टीभित्र छलफल अघि बढाएका थिए।

साहलाई मन्त्री बनाउने तयारी भएपछि उनी निर्वाचन क्षेत्रबाट काठमाडौं फर्किएको बताइएको छ। मन्त्री नियुक्तिको तयारीसँगै उनी काठमाडौं आएर आवश्यक प्रक्रियामा सहभागी हुने तयारीमा रहेको स्रोतको भनाइ छ।

उद्योग मन्त्रालयको जिम्मेवारी सम्हाल्ने तयारीमा रहेका साहसामु अहिले बजारमा देखिएको ग्यास आपूर्तिको समस्या समाधान गर्नु प्रमुख चुनौतीका रूपमा रहेको छ। पछिल्लो समय खाना पकाउने ग्यासको अभाव भएपछि उपभोक्ताले सास्ती भोगिरहेका छन्। ग्यासको सहज आपूर्ति तथा बजार व्यवस्थापनलाई लिएर सरकारमाथि समेत दबाब बढिरहेको छ।

यसअघि ग्यास आपूर्ति तथा उद्योगीहरूसँग सम्बन्धित विषयमा विवाद उत्पन्न भएपछि उद्योगमन्त्री गौरीकुमारी यादवले राजीनामा दिएकी थिइन्। उनको राजीनामासँगै मन्त्रालयको नेतृत्व परिवर्तन हुन लागेको हो।

प्रधानमन्त्री शाहको सचिवालयले साहलाई उद्योगमन्त्री बनाउने तयारी भइरहेको जानकारी दिए पनि नियुक्ति र शपथको औपचारिक प्रक्रिया भने पूरा हुन बाँकी रहेको छ।