काठमाडौं । कुशे औंसी अर्थात् बाबुको मुख हेर्ने दिन गोकर्णेश्वरमा श्रद्धालुको घुइँचो लागेको छ ।

दिवंगत पितृको सम्झनामा श्राद्ध, तर्पण तथा पिण्डदान गर्न बिहानैदेखि गोकर्णेश्वर महादेव मन्दिर क्षेत्रमा भक्तजनको चहलपहल बढेको हो । विभिन्न ठाउँबाट आएका श्रद्धालुले बागमती नदीमा स्नान गरी पितृप्रति श्रद्धा अर्पण गरेका छन् ।

कुशे औंसीका दिन गोकर्णमा श्राद्ध तथा तर्पण गरे दिवंगत पितृले शान्ति प्राप्त गर्ने धार्मिक विश्वास छ । सोही विश्वासका कारण बाबु गुमाएका तथा पितृको सम्झना गर्न चाहनेहरू गोकर्ण पुगेका हुन् ।

जीवित बाबुलाई भने यस दिन मिठा परिकार, नयाँ कपडालगायतका सामग्री दिएर सम्मान गर्ने परम्परा छ । बाबुप्रति सम्मान र दिवंगत पितृको स्मरण गर्ने भएकाले हिन्दू धर्मावलम्बीका लागि यो दिन विशेष मानिन्छ ।

कुशे औंसीलाई ऋषितर्पणी तथा गोकर्ण औंसीका रूपमा समेत चिनिन्छ । यसै दिन धार्मिक कार्यमा प्रयोग गरिने कुश घरमा भित्र्याउने चलन छ । धार्मिक अनुष्ठानमा पवित्र मानिने कुशको विशेष महत्व रहेको धार्मिक मान्यता छ ।

श्रद्धालुको भीड बढेसँगै गोकर्णेश्वर मन्दिर र बागमती नदी किनार क्षेत्रमा सुरक्षा तथा व्यवस्थापनका लागि सुरक्षाकर्मी परिचालन गरिएको छ ।

तस्बिर : नेपाल फोटो लाइब्रेरी