काठमाडौं। बजारमा ग्यासको हाहाकार मच्चिरहेका बेला उपत्यकामा ठूलो परिमाणमा सिलिन्डर लुकाएर राखिएको भेटिएको छ ।

प्रहरीले काठमाडौंका दुई ठाउँबाट एकैदिन ३७२ सिलिन्डर बरामद गर्दै महँगोमा ग्यास बेच्ने दुई कारोबारीलाई पक्राउ गरेको छ ।

उपत्यका अपराध अनुसन्धान कार्यालयको टोलीले नरेफाँटबाट १८३ र सामाखुसीबाट १८९ वटा सिलिन्डर बरामद गरेको हो ।

पक्राउ पर्नेमा नरेफाँटस्थित रामेछाप ब्रान्ड ग्यास डिलरका सञ्चालक नारायण श्रेष्ठ र बसुन्धारास्थित हाम्रो सगरमाथा सहकारीमार्फत ग्यास कारोबार गर्दै आएका प्रदीप घिमिरे छन् ।

प्रहरीका अनुसार नरेफाँटको डिलरले ठूलो संख्यामा सिलिन्डर थुपारेर बजारमा अभाव सिर्जना गर्ने र साँखु तथा चक्रपथ क्षेत्रमा महँगोमा बिक्री गर्ने गरेको प्रारम्भिक अनुसन्धानबाट खुलेको छ ।

घिमिरेले भने प्रतिसिलिन्डर २ हजार ६ सय रुपैयाँसम्ममा ग्यास बिक्री गर्ने गरेको प्रहरीको दाबी छ ।

ग्यास अभावकै बीच प्रहरीले बिहीबार भक्तपुरबाट थप १०३ सिलिन्डर बरामद गरेको थियो । सूर्यविनायकबाट ७५ र इटाछेबाट २८ सिलिन्डर बरामद भएका थिए ।

त्यस क्रममा सूर्यविनायक–३ ब्रह्मनगरमा सर्लाही जनरल स्टोर सञ्चालन गर्दै आएका २५ वर्षीय उमेश साह र इटाछेमा सगर ग्यास बिक्री गर्ने ४१ वर्षीय राजेश कर्माचार्य पक्राउ परेका छन् ।

प्रहरीका अनुसार साहले एउटा सिलिन्डर २ हजार ८ सय रुपैयाँसम्ममा बिक्री गर्ने गरेका थिए । भक्तपुरबाट पक्राउ परेकालाई थप अनुसन्धानका लागि जिल्ला प्रहरी परिसर भक्तपुरमा बुझाइएको छ ।

दुई दिनमै काठमाडौं र भक्तपुरबाट ४७५ सिलिन्डर बरामद भएपछि अहिलेको ग्यास अभाव आपूर्तिको समस्यामात्र हो कि गोदाममा थुपारेर कृत्रिम रूपमा अभाव सिर्जना गरिएको हो भन्ने प्रश्न उठेको छ ।

प्रहरीले ग्यास लुकाउने, अभाव सिर्जना गर्ने र तोकिएको मूल्यभन्दा बढीमा बिक्री गर्नेमाथि निगरानी र कारबाही जारी राख्ने जनाएको छ ।