काठमाडौं । बजारमा खाना पकाउने ग्यासको अभाव चर्किएपछि सत्तारुढ राष्ट्रिय स्वतन्त्र पार्टी (रास्वपा)की सांसद आशिका तामाङले सरकारमाथि कडा प्रश्न उठाएकी छन् ।

शुक्रबार प्रतिनिधिसभाको बैठकमा बोल्दै उनले ग्यास अभावका कारण सर्वसाधारण भोकै बस्नुपर्ने अवस्था आउँदा पनि सरकारले जनताको समस्यालाई गम्भीर रूपमा नलिएको आरोप लगाइन् ।

उनका अनुसार बजारमा ग्यासका सिलिन्डर भए पनि कतिपय व्यवसायीले बिक्री नगरेको गुनासो उपभोक्ताबाट आइरहेको छ । ‘पसलमा ग्यास छ, तर बेच्न मान्दैनन्’ भन्दै आफूलाई दैनिक हजारौँ फोन आउने गरेको उनले बताइन् ।

तामाङले सरकारभन्दा ग्यासको कालोबजारी गर्ने गिरोह बलियो भएको हो कि भन्दै प्रश्न गरिन् । जनताले ठूलो मत दिएर सरकारमा पठाए पनि अहिले दाउरा खोजेर खाना पकाउनुपर्ने अवस्था आउनु गम्भीर विषय भएको उनको भनाइ थियो ।

ग्यासको अभाव चर्किरहेका बेला सरकारले मन्त्री परिवर्तनमा मात्र ध्यान दिएको भन्दै उनले व्यंग्य गरिन् । ‘महिनैपिच्छे ग्यासकै लागि मन्त्री फेरिरहने हो भने ग्यासको लाइनभन्दा मन्त्रीको लाइन लामो हुनेछ,’ उनले भनिन् ।

यदि वास्तवमै बजारमा ग्यासको अभाव हो भने सरकारले तत्काल सार्वजनिक रूपमा अवस्था स्पष्ट पार्नुपर्ने तामाङको माग छ । जनतालाई वास्तविक स्थिति जानकारी गराएर आपूर्ति सहज बनाउन सरकारले तत्काल कदम चाल्नुपर्ने उनले बताइन् ।

सरकार जनताको दैनिक समस्याप्रति संवेदनशील हुन नसकेको आरोप लगाउँदै उनले ग्यास आपूर्ति व्यवस्थित गर्न र कालोबजारी नियन्त्रण गर्न तत्काल प्रभावकारी कदम चाल्न माग गरिन् ।