काठमाडौं । सत्तारुढ राष्ट्रिय स्वतन्त्र पार्टी (रास्वपा)का सांसद खगेन्द्र सुनारले प्रहरी महानिरीक्षक दानबहादुर कार्कीमाथि प्रहरीका बन्दोबस्तीका सामग्री खरिदमा करोडौँ रुपैयाँ अनियमितता गरेको आरोप लगाउँदै सरकारको ध्यानाकर्षण गराएका छन् ।

शुक्रबार प्रतिनिधिसभाको बैठकमा बोल्दै सुनारले मोजा, जुत्ता तथा कपडालगायत प्रहरीका सामग्री खरिदमा भएको भनिएको अनियमितताको विषय सार्वजनिक लेखा समितिसहित सम्बन्धित निकायमा पुगिसक्दा पनि सरकारले छानबिनमा चासो नदेखाएको आरोप लगाए ।

उनले अन्य पदाधिकारीमाथि सामान्य आरोप लाग्दा समेत कारबाही हुने तर प्रहरी प्रमुखमाथि गम्भीर आर्थिक अनियमितताको आरोप लाग्दा पनि पदमै राखिएको भन्दै सरकारको कार्यशैलीमाथि प्रश्न उठाए ।

सुनारले मन्त्री र प्रहरी महानिरीक्षकका लागि छुट्टाछुट्टै मापदण्ड हुन नहुने भन्दै आरोपबारे तत्काल निष्पक्ष अनुसन्धान गर्न माग गरे ।

प्रहरी संगठनभित्र आर्थिक अनियमितताको आरोप लाग्नु संवेदनशील विषय भएको उल्लेख गर्दै उनले यस्ता आरोपले सुरक्षा निकायप्रतिको जनविश्वास र संगठनको साखमा असर पर्ने बताए ।

उनले आरोप पुष्टि भए महानिरीक्षकलाई निलम्बन गरी कानुनी प्रक्रियाबाट अनुसन्धान अघि बढाउनुपर्ने मागसमेत गरे ।

भ्रष्टाचारसम्बन्धी विषय सार्वजनिक भइसकेपछि पनि सरकार मौन बस्नुले अनियमिततालाई संरक्षण गरेको सन्देश जाने उनको आरोप थियो ।