काठमाडौं । सप्तरीको राजविराजमा एक गर्भवती महिलाले पैसा अभावमा अस्पतालको चिसो पेटीमा शिशु जन्माउनु परेको घटनाप्रति जय नेपाल पार्टीनिकट नेपाल महिला संगठनले सरकारको कडा शब्दमा आलोचना गरेको छ ।

संगठनकी सभापति चाहना (चम्पा) अधिकारीले आर्थिक अभावका कारण ती महिला स्वास्थ्य सेवाबाट वञ्चित हुनुपरेको घटनालाई अत्यन्तै पीडादायी भन्दै सरकारको गम्भीर ध्यानाकर्षण गराइन् ।

उनले अस्पतालको वेवास्ताले एक आमाले अस्पतालको ढोकामै बच्चालाई जन्म दिनुपरेको दर्दनाक घटनाले हाम्रो समाज कहाँ पुगेछ ? भन्दै प्रश्न गरिन् ।

सरकारको नैतिक जिम्मेवारी र संवेदनशीलता कति स्खलित भएछ भन्दै उनले आक्रोश पोखेकी छन् ।

साथै, स्वास्थ्य क्षेत्र, सेवा र धर्मभन्दा आम्दानी र मुनाफामा सीमित भएको हो कि भन्ने अवस्थाले समाजलाई झस्काएको उनको भनाइ छ ।

यस्तो घटना अत्यन्तै दुःखद् र लज्जास्पद रहेको उनले बताएकी हुन् । यसले राज्य आफ्नो जिम्मेवारीबाट पूर्ण रूपमा चुकेको देखाएको बताउँदै घटनाको तत्काल छानबिन गरी दोषिउपर कानुन बमोजिम कारबाही गर्न उनको माग छ ।