काठमाडौं । राष्ट्रिय प्रजातन्त्र पार्टी (राप्रपा) का सांसद ताहिर अली भाटले आइतबार दिइँदै आएको सार्वजनिक बिदा हटाउन सरकारसँग माग गरेका छन्।

मंगलबार बसेको प्रतिनिधिसभाको बैठकमा बोल्दै भाटले आइतबारको बिदाका कारण सार्वजनिक सेवा प्रवाह प्रभावित भएको दाबी गरे।

उनले आइतबारको बिदा सरकारी कर्मचारीदेखि विद्यालय र शिक्षा क्षेत्रसम्म कसैका लागि आवश्यक नरहेको बताए।

‘आइतबारको बिदा कसैलाई पनि चाहिएको छैन। न सरकारी कर्मचारीलाई यो आवश्यक छ, न त विद्यालय वा शिक्षा क्षेत्रलाई नै,’ उनले भने।

भाटले आइतबारको बिदा हटाएर पुरानै कार्यतालिका लागू गर्नुपर्ने बताए। उनका अनुसार शुक्रबार आधा दिन र शनिबार पूर्ण बिदाको व्यवस्था पुनः कायम गरिनुपर्छ।

आइतबार सार्वजनिक बिदा हुँदा सर्वसाधारणले सरकारी सेवा लिन कठिनाइ भोग्नुपरेको भाटको भनाइ छ।

यसबाट प्रशासनिक कामसँगै विकास निर्माणका गतिविधिमा समेत ढिलाइ भइरहेको उनले बताए।

‘बिदाको व्यवस्थाले कसैलाई पनि फाइदा पुगेको छैन,’ भाटले भने, ‘जनभावनाको कदर गर्दै तत्काल यो व्यवस्था खारेज गरी पुरानै कार्यतालिका कार्यान्वयन गरियोस्।’

उनले सार्वजनिक सेवा प्रभावकारी बनाउन बिदाको वर्तमान प्रणालीमाथि पुनर्विचार गर्न सरकारसँग आग्रह गरेका छन्।