काठमाडौं । नेपाल कम्युनिष्ट पार्टी (एमाले) का सांसद गणेशसिंह ठगुन्नाले जोखिममा रहेका बस्ती स्थानान्तरणका लागि विपद् जोखिम न्यूनीकरण तथा व्यवस्थापन प्राधिकरणबाट अविलम्ब विज्ञ टोली पठाई आवश्यक व्यवस्थापन गर्न सरकारसँग माग गरेका छन्।

मंगलबार प्रतिनिधिसभाको बैठकमा बोल्दै उनले यस्तो माग गरेका हुन्।

उनले दार्चुलाको व्यास गाउँपालिका–४ स्थित मडगाउँ बस्तीमाथिबाट जमिन भासिँदा तीन दर्जन घर क्षतिग्रस्त भएको र स्थानीयवासी विस्थापित भएको बताए।

विस्थापित नागरिकलाई तत्काल अस्थायी बसोबास र राहतको व्यवस्था गर्न पनि उनले सरकारको ध्यानाकर्षण गराए।

यसैगरी, भदौ २८ गते नौगाड गाउँपालिका–४ स्थित सिफ्टी गैरा बस्तीमाथिबाट पहिरो खसेपछि उक्त बस्ती जोखिममा रहेको भन्दै बस्ती संरक्षणका लागि आवश्यक व्यवस्थापन गर्न उनले आग्रह गरे।

त्यस्तै, उनले दैवी प्रकोपका घटनामा तत्काल राहत, उद्धार, पुनर्निर्माण तथा पुनःस्थापनाका लागि गृह मन्त्रालयअन्तर्गतको केन्द्रीय दैवी प्रकोप उद्धार समितिमार्फत थप बजेट जिल्ला दैवी प्रकोप उद्धार समितिलाई उपलब्ध गराउन पनि माग गरे।