काठमाडौं। सरकारले ल्याएको पूँजी बजार सुधार कार्ययोजनाले सेयर बजारमा सकारात्मक परिवर्तन ल्याएको छ।

मंगलवार बजार परिसूचक नेप्से ४८.५७ अंक (१.८७ प्रतिशत) बढेको छ ।

बजार वृद्धिपछि नेप्से परिसूचक २६३३ अंकमा कायम रहेको छ । अर्थमन्त्री स्वर्णिम वाग्लेले पूँजीगत लाभकर हालको भन्दा आधा घटाउनेसहित बजार सुधारको कार्यायोजना सार्वजनिक गरेका हुन् ।

 कार्ययोजना लागु भएसँगै लगानिकर्तामा हौसला बढेको छ ।

कारोबार रकममा पनि वृद्धि देखिएको छ । आज ८ अर्ब २९ करोडको कारोबार भएको छ । सोमवार ४ अर्ब ६८ करोडको कारोबार भएको थियो । आजको कारोबार रकम २ महिना यताकै सबैभन्दा उच्च हो ।

मंगलवार सबै समूहगत सूचक बढेको छ । बैंकिङ १.९०, विकास बैंक १.७६, फाइनान्स २.२३, होटल तथा पर्यटन १.४२, जलविद्युत् १.८४, लगानी २.५२, जीवन बीमा २.५९, उत्पादन तथा प्रशोधन ०.७७, माइक्रोफाइनान्स १.७५, निर्जीवन बीमा २.८२, अन्य २.१२ र व्यापार ०.९२ प्रतिशत बढेको छ ।

आज २६५ कम्पनीको मूल्य बढेको छ । १२ कम्पनी घाटामा छ भने एउटा स्थिर रहेको छ । धौलागिरि लघुवित्तको १४.९६, सिन्धु विकास बैंकको ११.०३, मल्टिपर्पस फाइनान्सको ९.७३, जानाकी फाइनान्सको ८.०६, मिडसोलु हाइड्रोपावरको ६.६७ प्रतिशत मूल्य बढेको छ ।

त्यस्तै, बोटलर्स नेपाल बालाजुको २.९७, रिलायन्स स्पिनिङ मिल्सको १.९४, सर्वोत्तम पेन्टसको १.६६ प्रतिशत मूल्य घट्यो। 

आज धेरै कारोबार भएका कम्पनीमा रिलायन्स स्पिनिङ मिल्स, शिवम् सिमेन्ट, अपी पावर, एनआरएन इन्फ्रास्ट्रक्चर, लिबर्टी इनर्जी तथा लक्ष्मी सनराइज बैंक अगाडि रहेको छ।