काठमाडौं । वैदेशिक रोजगारीका लागि विभिन्न देश पठाइदिन्छु भन्दै आकर्षक तलबको प्रलोभनमा पारी रकम ठगी गरेको अभियोगमा प्रहरीले दुई जनालाई पक्राउ गरेको छ।

पक्राउ पर्नेहरूमा काठमाडौंको चन्द्रागिरी नगरपालिका–७ बस्ने ४५ वर्षीय गंगाबहादुर कटुवाल र सर्लाहीको हरिवन नगरपालिका–२ घर भई काठमाडौं बस्ने ३८ वर्षीय हेमबहादुर बोम्जन रहेका छन्।

पक्राउ परेकामध्ये कटुवालले जापान पठाइदिन्छु भन्दै एक जना पीडितबाट १ लाख ५० हजार रुपैयाँ ठगी गरेको आरोप छ।

त्यस्तै, बोम्जनले पनि जापान पठाइदिन्छु भन्दै एक जना पीडितबाट १ लाख रुपैयाँ ठगी गरेको प्रहरीले जनाएको छ।

ठगी गरेर बेपत्ता भएका कटुवाललाई प्रहरीले काठमाडौं महानगरपालिका–१२ बाट पक्राउ गरेको हो। त्यस्तै, बोम्जनलाई काठमाडौं महानगरपालिका–२८ बाट पक्राउ गरिएको जनाइएको छ।

प्रहरीका अनुसार उनीहरूलाई थप अनुसन्धान तथा कारबाहीका लागि वैदेशिक रोजगार विभाग, ताहाचल, काठमाडौं पठाइएको छ।