काठमाडौं । सेवाग्राहीसँग ९ लाख रुपैयाँ घुस लिएर रेस्टुरेन्टमा बसेका नापी अधिकृत अख्तियारको फन्दामा परेका छन्।

अख्तियार दुरुपयोग अनुसन्धान आयोगले नापी कार्यालय डिल्लीबजारअन्तर्गत ३ नम्बर नापी टोली, माछापोखरीका टोली प्रमुखसमेत रहेका नापी अधिकृत डिल्लीबहादुर वलीलाई घुसको रकमसहित पक्राउ गरेको हो।

आयोगका अनुसार वलीले छुट जग्गा दर्ता सिफारिससहितको मिसिल भूमि प्रशासन कार्यालय मनमैजुमा पठाउने कामका लागि सेवाग्राहीसँग रकम माग गरेका थिए। काममा अनावश्यक ढिलाइ र झन्झट सिर्जना गर्दै घुस मागेको आरोप उनीमाथि छ।

अख्तियारको टोलीले वलीलाई काठमाडौंको टोखा नगरपालिका–५, वसुन्धरा चोकस्थित एक रेस्टुरेन्टबाट ९ लाख रुपैयाँ नगदसहित नियन्त्रणमा लिएको जनाएको छ।

पक्राउ परेका वलीमाथि थप अनुसन्धानका लागि अख्तियारले विशेष अदालतबाट म्यादसमेत थप गराएको छ। घटनाबारे थप अनुसन्धान भइरहेको आयोगले जनाएको छ।