काठमाडौं । मोबाइल र इन्टरनेटमा अनावश्यक समय बिताउने बानी घटाउन सिंगापुर सरकारले नागरिकलाई किताब पढेबापत पैसा दिने योजना ल्याएको छ।

सरकारले यसै महिनाबाट सुरु गरेको योजनामा नागरिकले दैनिक कम्तीमा १५ मिनेट पुस्तक पढेपछि अंक अर्थात् भर्चुअल सिक्का पाउनेछन्। जम्मा भएको सिक्का निश्चित सीमामा पुगेपछि त्यसलाई नगदमा रूपान्तरण गर्न सकिनेछ।

योजनाअनुसार १५ मिनेट वा त्यसभन्दा बढी समय पुस्तक पढेको प्रत्येक अध्ययन सत्रमा २० भर्चुअल सिक्का दिइनेछ। एक दिनमा भने एउटा मात्र अध्ययन सत्र दर्ता गर्न पाइनेछ।

एक हजार सिक्का जम्मा भएपछि एक सिंगापुर डलर प्राप्त हुनेछ। अर्थात् एक डलर कमाउन ५० दिनसम्म दैनिक १५ मिनेट पुस्तक पढेको विवरण दर्ता गर्नुपर्नेछ।

सिंगापुरको नेसनल लाइब्रेरी बोर्डले यो योजनामार्फत नागरिकमा नियमित पठन संस्कार विकास गर्नुका साथै एकाग्रता, तार्किक सोच र कल्पनाशीलता बढाउने लक्ष्य राखेको जनाएको छ।

बोर्डकी प्रमुख मेलिसा तामका अनुसार ठूलो लक्ष्यभन्दा साना र निरन्तर अभ्यासबाट पठन संस्कृतिको विकास गर्न सकिन्छ।

उनले दैनिक १५ मिनेट पढ्ने बानीलाई सहज लक्ष्यका रूपमा अघि सारिएको बताउँदै यात्रा गर्दा, सुत्नुअघि वा खाना खाने समयमा समेत पुस्तक पढ्न सकिने बताएकी छन्।

सरकारले नागरिकको व्यवहारमा सकारात्मक परिवर्तन ल्याउन आर्थिक प्रोत्साहन प्रयोग गरेको यो पहिलोपटक भने होइन। यसअघि स्वास्थ्य प्रवर्द्धनका कार्यक्रमअन्तर्गत नियमित हिँड्ने बानी विकास गर्न दैनिक पाइला पूरा गरेबापत पुरस्कार तथा सुपरमार्केट भौचर दिने कार्यक्रमसमेत सञ्चालन गरिएको थियो।

नयाँ पठन अभियानलाई पनि यस्तै ‘ग्यामिफिकेसन’ अर्थात् खेलजस्तो प्रोत्साहन प्रणालीमा आधारित बनाइएको छ, जसमा नियमित पुस्तक पढ्ने बानीलाई अंक र पुरस्कारसँग जोडिएक