काठमाडौं । प्रहरीले देशका विभिन्न जिल्लाबाट लागूऔषधसहित ३७ जनालाई पक्राउ गरेको छ।

प्रहरीका अनुसार उनीहरूको साथबाट गाँजा, खैरो हेरोइन, ब्राउनसुगर तथा नियन्त्रित औषधि बरामद भएको छ।

कैलालीमा जानकी गाउँपालिका-७ उच्चा गोलौरीबाट २ ग्राम ८३० मिलिग्राम खैरो हेरोइन जस्तो देखिने पदार्थसहित दुई जना पक्राउ परेका छन्।

धनकुटामा २४ वर्षीय उज्वल थापाको घरबाट २०४ ट्रामाडोल र २०४ स्पास्पेन ट्याब्लेट बरामद भएको छ।

बझाङमा बित्थडचिर गाउँपालिका-८ रूपैलबाट १ किलो ९९ ग्राम चरेस जस्तो देखिने पदार्थसहित ३२ वर्षीय नरेन्द्रकुमार ऐडी र ६१ वर्षीय सिंग धामी पक्राउ परेका छन्।

प्रहरीले झापामा दमकबाट ३ ग्राम ९१० मिलिग्राम खैरो हेरोइन जस्तो देखिने पदार्थसहित तीन जनालाइ पक्राउ गरेकाे हाे । मेचीनगरबाट १३० मिलिग्राम उक्त पदार्थसहित दुई जना पक्राउ परेका छन्। अनुसन्धानका क्रममा उनीहरूले नारायण किसानको घरबाट पदार्थ खरिद गरेको खुलेपछि किसानको घर तलासी गरिएको थियो। त्यहाँ थप १० ग्राम १३० मिलिग्राम पदार्थ फेला परेकोले प्रहरीले किसानलाइ समेत प्नकाउ गरेकाे हाे। 

धनुषामा धनुषाधाम नगरपालिका-८ बाट २७ ग्राम ९१० मिलिग्राम खैरो हेरोइन जस्तो देखिने पदार्थसहित दुई जना पक्राउ परेका छन्।

ललितपुरमा ६६० ट्रामाडोल र १४५ नाइट्राजेपाम ट्याब्लेटसहित तीन जना र सिराहामा गोलबजारबाट १ ग्राम ३८० मिलिग्राम खैरो हेरोइन जस्तो देखिने पदार्थसहित २४ वर्षीय महमद साहिल आलम पक्राउ परेका छन्।

त्यस्तै, बारामा तीन छुट्टाछुट्टै घटनामा लागूऔषधसहित तीन जना पक्राउ परेका छन्। प्रहरीले जीतपुरसिमराबाट १६ किलो ५८० ग्राम गाँजा, करिब १ ग्राम र १६ ग्राम ९९० मिलिग्राम ब्राउनसुगर जस्तो देखिने पदार्थ बरामद गरेको जनाएको छ।

कास्कीमा दुई घटनामा आठ जना पक्राउ परेका छन्। अन्नपूर्ण गाउँपालिकाबाट करिब २ ग्राम खैरो हेरोइन जस्तो देखिने पदार्थ, ९७ डाइजेपाम र ११० टापेन्टाडोल ट्याब्लेट बरामद भएको छ।

पोखरा महानगरपालिका-५ बाट ४०० डाइजेपाम, ६०० बुप्रेनोर्फिन, ६१३ फेनारगन एम्पुल र ९९८ टापेन्टाडोल ट्याब्लेटसहित ६ जना पक्राउ परेका छन्। भने महोत्तरीमा बर्दिबास नगरपालिका-१ बाट करिब १९६ किलो गाँजासहित दुई जना पक्राउ गरेको प्रहरीले जनाएको छ।

थप अनुसन्धान भइरहेकाे प्रहरीले जानकारी गराएकाे छ।