काठमाडौं । राहदानी विभागअगाडि ऋद्धिसिद्धी यातायातको बसमा भएको आगलागी घटनाबारे प्रहरीले छानबिन समिति गठन गरेको छ।

घटनाअघि बस चालक दावा लामा र ट्राफिक प्रहरीबीच भनाभन भएको देखिएको भिडियो सामाजिक सञ्जालमा सार्वजनिक भएपछि ट्राफिक प्रहरीको भूमिकाबारे समेत छानबिन गर्न समिति गठन गरिएको हो।

उपत्यका प्रहरी कार्यालय, रानीपोखरीले एसएसपी रमेश बस्नेतको संयोजकत्वमा समिति गठन गरेको जनाएको छ।

साथै, समितिलाई घटनाको समग्र पक्षबारे छानबिन गरी पाँच दिनभित्र प्रतिवेदन बुझाउन समय दिइएको छ।

प्रहरीका अनुसार राहदानी विभागअगाडि बसभित्रै आगो लगाएर आत्मदाहको प्रयास गर्नुअघि चालक लामा र ट्राफिक प्रहरीबीच भनाभन भएको थियो। उक्त घटनासँग सम्बन्धित भिडियो अहिले सामाजिक सञ्जालमा भाइरल भइरहेको छ।

घटनामा गम्भीर घाइते चालक लामाको कीर्तिपुरस्थित बर्न अस्पतालमा उपचार भइरहेको छ। साथै, उनको अवस्था चिन्ताजनक रहेको प्रहरीले जनाएकाे छ।