काठमाडौं। ब्राउन सुगर जस्तो देखिने लागु औषधसहित बारामा एक भारतीय नागरिक पक्राउ परेका छन्।

पक्राउ पर्नेमा भारतको मोतीहारी, नकरदेही पञ्चायत वडा नं. २ बिर्ता टोल बस्ने करिब ४० वर्षीय दुखी साह रहेका छन्।

असोज ४ गते बिहान ९:३० बजेको समयमा इलाका प्रहरी कार्यालय प्रसौनी र प्रहरी चौकी मुसहरवा बाराबाट संयुक्त रूपमा खटिएको प्रहरी टोलीले जाँचका क्रममा उनलाई नियन्त्रणमा लिएको हो। बाराको विश्रामपुर गाउँपालिका वडा नं. ४ बलिरामपुर स्थित भारतबाट नेपालतर्फ साइकलमा आउँदै गरेका साहलाई रोकेर जाँच गर्दा साइकलको सिटमुनि लुकाइ-छिपाई ल्याउँदै गरेको प्लाष्टिकसहित ७.३५ ग्राम ब्राउन सुगर जस्तो देखिने धुलो पदार्थ बरामद भएको प्रहरीले जनाएको छ।

पक्राउ परेका साहमाथि लागु औषध कसूरमा मुद्दा दर्ता गरी जिल्ला अदालत कलैयाबाट ५ दिनको म्याद थप गरेर इलाका प्रहरी कार्यालय प्रसौनीबाट थप अनुसन्धान भइरहेको सूचना अधिकारी प्रहरी नायव उपरीक्षक मिन बहादुर घलेले जानकारी दिएका छन्।