काठमाडौं । राष्ट्रिय स्वतन्त्र पार्टी (रास्वपा)की सचेतक क्रान्तिशिखा धितालले भोटेकोशी बाढीमा परी ज्यान गुमाएका तथा बेपत्ता भएकाहरूको अवस्थाबारे सरकारको ध्यानाकर्षण गराएकी छन्।

प्रतिनिधिसभाको सोमबारको बैठकमा बोल्दै सचेतक धितालले महाविपत्तिमा परेका पीडितले राज्यबाट पाउनुपर्ने राहत तथा सहयोगमा भइरहेको ढिलासुस्तीप्रति आपत्ति जनाइन्।

धितालले हालसम्म १ हजार ४५१ जनाको मृत्यु पुष्टि भएको र ५ हजार ७८६ जनाको अवस्था अझै यकिन हुन नसकेको बताइन्।

‘फेला पर्छन् कि भनेर आशाको दियालो जगाइरहेका आफन्तहरूको अवस्था दयनीय छ,’ उनले भनिन्।

उनले पीडित परिवारले कानुनी जटिलताका कारण थप सास्ती भोग्नुपरेको बताइन्। धेरै परिवारले अन्तिम संस्कारको प्रक्रिया पूरा गरिसके पनि आश्रित परिवारको पुनरुत्थानमा अनेकौँ कानुनी तथा प्रशासनिक बाधा रहेको उनको भनाइ छ।

‘धेरैले अन्तिम संस्कारको रीत पूरा गरिसकेका छन्, तर आश्रित परिवारको पुनरुत्थानमा अनेकौँ बाधा छन्,’ उनले भनिन्।

मृत्युको आधिकारिकता र आवश्यक कागजी प्रक्रिया पूरा हुन नसक्दा प्रभावित परिवार दोहोरो मारमा परेको धितालले बताइन्।

उनले नागरिकको कानुनी हैसियत कायम गर्न, सम्पत्तिको हक हस्तान्तरण गर्न तथा राज्यबाट प्राप्त हुने सेवा–सुविधा उपलब्ध गराउन सरकारले तत्काल प्रक्रिया अघि बढाउनुपर्ने माग गरिन्।

‘तत्काल न्यायिक तथा प्रशासनिक बाटो प्रशस्त गरिनुपर्छ। राहत र सामाजिक सुरक्षा उपलब्ध गराउने कार्यविधि तोक्न ढिलाइ गरेर नागरिकलाई अन्योलमा राख्ने छुट सरकारसँग छैन,’ उनले भनिन्।