काठमाडौं। राष्ट्रिय स्वतन्त्र पार्टीकी सांसद क्रान्तिशिखा धितालले चालक र यात्रुसँग ट्राफिक प्रहरीले गर्ने व्यवहार तथा कार्यशैलीको गम्भीर समीक्षा गर्न सरकारसँग माग गरेकी छन्।

मंगलबार प्रतिनिधिसभाको आकस्मिक समयमा बोल्दै धितालले त्रिपुरेश्वरमा भएको घटनापछि सडकमा राष्ट्रसेवक, सुरक्षाकर्मी तथा ट्राफिक प्रहरीको व्यवहारबारे पुनरावलोकन आवश्यक देखिएको बताइन्।

उनले त्रिपुरेश्वर घटनासँग जोडिएका विगतका विवाद र बाहिर आएका सूचनामाथि समेत थप अनुसन्धान गरी प्रहरीले सत्यतथ्य सार्वजनिक गर्ने विश्वास व्यक्त गरिन्।

धितालले सार्वजनिक सवारीका चालकको आत्मसम्मान र काम गर्ने वातावरणलाई पनि गम्भीर रूपमा लिनुपर्ने बताइन्।

उनका अनुसार चालकको न्यून पारिश्रमिक, खानपान, आराम, लामो समयसम्म काम गर्नुपर्ने अवस्था तथा शारीरिक र मानसिक स्वास्थ्यको परीक्षण नहुनु संवेदनशील विषय हुन्।

‘चालकलाई मात्र दोष थोपरेर समस्या समाधान हुँदैन,’ उनले भनिन्, ‘राज्य, सम्बन्धित निकाय, यातायात व्यवसायी र स्वयं चालक पनि यस विषयमा गम्भीर हुनुपर्छ।’

उनले सडक सुरक्षालाई प्रभावकारी बनाउन चालकको व्यवहारसँगै उनीहरूले काम गर्ने समग्र वातावरण सुधार गर्नुपर्नेमा जोड दिइन्।

प्रतिनिधिसभाको बैठकमा अन्य सांसदहरूले पनि त्रिपुरेश्वरमा भएको घटनाप्रति दुःख व्यक्त गरेका छन्।

उनीहरूले सार्वजनिक यातायात क्षेत्रमा देखिएका समस्या, चालकको कार्य अवस्था र ट्राफिक व्यवस्थापनबारे गम्भीर समीक्षा गर्नुपर्ने बताएका छन्।

सांसदहरूले घटनाबारे गृहमन्त्रीसँग जवाफ माग गर्दै वास्तविकता संसद्लाई जानकारी गराउनुपर्ने बताएका छन्।