काठमाडौं । नेपाली कम्युनिस्ट पार्टी (नेकपा)को केन्द्रीय कार्यसंयोजन समितिको बैठक पेरिसडाँडामा सुरु भएको छ।

प्रवक्ता प्रकाश ज्वालाका अनुसार बैठकमा पछिल्लो राजनीतिक परिस्थितिसँगै पार्टीका आगामी सांगठनिक गतिविधिबारे छलफल भइरहेको छ।

नेकपाले यसअघि तय गरेको महाधिवेशनको कार्यतालिका प्रभावित भएपछि त्यसलाई पुनः मिलाउने तयारी गरिएको छ। बैठकले महाधिवेशन तथा अधिवेशनको नयाँ मिति र कार्यतालिकाबारे निर्णय गर्नेछ।

बैठकका लागि आठवटा मुख्य एजेन्डा तय गरिएको छ।

बैठकको सुरुवात शहीदप्रति श्रद्धाञ्जलीबाट हुनेछ। त्यसपछि संयोजक र सहसंयोजकले वर्तमान राष्ट्रिय परिस्थिति तथा पार्टीको आगामी जिम्मेवारीबारे धारणा राख्ने कार्यक्रम छ।

महाधिवेशन र विभिन्न तहका अधिवेशन, सचिवालय तथा कार्यसमिति बैठक सञ्चालन, पार्टी र जनवर्गीय संगठनको समायोजन तथा सदस्यता नवीकरणबारे पनि छलफल हुनेछ।

त्यस्तै, विशेष संगठन सुदृढीकरण अभियान अघि बढाउने, विभिन्न समूह तथा व्यक्तिलाई पार्टीमा समाहित गर्ने विषय पनि एजेन्डामा राखिएको छ।

बैठकको विविधतर्फ भोटेकोशी बाढीबाट प्रभावित नागरिकको पुनर्स्थापना र पुनर्निर्माणको विषय समेटिएको छ।

बाढीपीडितका लागि पार्टीको तर्फबाट सञ्चालन गरिने पुनर्स्थापना तथा पुनर्निर्माण अभियानबारे पनि बैठकले आवश्यक निर्णय गर्ने बताइएको छ।

प्रवक्ता ज्वालाका अनुसार समसामयिक राजनीतिक घटनाक्रमसँगै पार्टीको सांगठनिक संरचना र आगामी अभियानलाई प्रभावकारी बनाउने विषयमा बैठक केन्द्रित रहनेछ।