काठमाडौं । राष्ट्रिय स्वतन्त्र पार्टी (रास्वपा) का नेता भोला साहको घरबाट करिब ५० लाख रुपैयाँ मूल्य बराबरका मोबाइल पार्टस् बरामद भएका छन्।

सशस्त्र प्रहरी बलको रौतहटस्थित नम्बर ११ गण हेडक्वार्टरबाट खटिएको टोलीले गौर नगरपालिका–४, टिकुलियास्थित साहको घरमा छापा मार्दा ५० लाख १४ हजार ५ सय रुपैयाँ बराबरका मोबाइल पार्टस् फेला पारेको हो।

ठूलो परिमाणमा सामान लुकाएर राखिएको सूचनाका आधारमा सशस्त्र प्रहरी परिचालन गरिएको थियो। नम्बर २ छिन्नमस्ता बाहिनी मुख्यालयबाट सूचना आएपछि एसपी चेतराज जोशीको कमाण्डमा टोली खटिएको थियो।

खानतलासीका क्रममा घरभित्र लुकाएर राखिएको अवस्थामा मोबाइल पार्टस् फेला परेको सशस्त्र प्रहरीले जनाएको छ। छापाका क्रममा करिब ४५ जना सशस्त्र प्रहरी परिचालन भएका थिए। गौर भन्सार कार्यालयका प्रतिनिधिसमेत टोलीमा सहभागी थिए।

घरबाट ठूलो परिमाणमा मोबाइल पार्टस् फेला परेपछि प्रहरीले भन्सार प्रक्रिया र सामानको कानुनी स्रोतबारे अनुसन्धान अघि बढाएको छ।

खानतलासीका क्रममा तीन थान मोटरसाइकलसमेत नियन्त्रणमा लिइएको छ।

सशस्त्र प्रहरीले बरामद सबै सामग्री गौर भन्सार कार्यालयमा बुझाएको जनाएको छ। अब भन्सारले सामानको स्रोत, मूल्यांकन, भन्सारसम्बन्धी कागजात तथा संलग्न व्यक्तिको भूमिकाबारे अनुसन्धान गर्नेछ।

बरामद सामान अवैध रूपमा ल्याइएको वा भन्सार छली भएको भन्ने विषय भने अनुसन्धानपछि मात्रै टुंगो लाग्नेछ।