काठमाडौं । राष्ट्रिय स्वतन्त्र पार्टी (रास्वपा) का सांसद धनञ्जय रेग्मीले बङ्गालको खाडीमा विकसित न्यून चापीय प्रणालीका कारण आगामी केही दिन भारीदेखि अति भारी वर्षा हुन सक्ने भन्दै बाढीसँगै पहिरोको जोखिमप्रति पनि सतर्क रहन आग्रह गरेका छन्।

प्रतिनिधिसभाको बिहीबारको बैठकमा आकस्मिक समयमा बोल्दै रेग्मीले वर्षाका कारण जोखिम बढ्न सक्ने क्षेत्रमा अनावश्यक आवतजावत नगर्न र सुरक्षित रहन नागरिकलाई आग्रह गरे।

उनले विशेषगरी पहाडी क्षेत्रमा बसोबास गर्ने नागरिकले आफ्नो घर र आसपासको जमिनको अवस्थाबारे नियमित निगरानी गर्नुपर्ने बताए।

घर वरिपरि नयाँ चिरा देखिनु, जमिन अस्वाभाविक रूपमा धसिनु वा फुल्नु, रूख तथा बिजुलीका खम्बा ढल्किनु, घरको भित्ता वा जगमा नयाँ चिरा पर्नु तथा पहिले पानी ननिस्किएको स्थानबाट अचानक पानी आउनु पहिरोको सम्भावित संकेत हुन सक्ने उनले बताए।

‘यस्ता असामान्य संकेत देखिए जोखिमयुक्त घरमै बसिरहनु हुँदैन। समयमै सुरक्षित स्थानमा सर्नुपर्छ,’ रेग्मीले भने।

रेग्मीले पछिल्लो समय विपद्को जोखिमबारे बाढी र नदीमा बढी ध्यान केन्द्रित भइरहेको भन्दै पहाडी क्षेत्रमा पहिरोको जोखिमलाई पनि उत्तिकै प्राथमिकता दिनुपर्ने बताए।

विगतमा रातको समयमा पहिरोले घर पुरिँदा वा बगाउँदा ठूलो मानवीय क्षति भएका घटना स्मरण गराउँदै उनले वर्षाका बेला जोखिममा रहेका बस्तीको विशेष निगरानी गर्नुपर्नेमा जोड दिए।

उनले बाढीको चेतावनीसँगै पहिरोका सम्भावित पूर्वसंकेतबारे पनि नागरिकलाई सरल भाषामा जानकारी दिन सरकारसँग माग गरे।

एफएम रेडियो, टेलिभिजन, मोबाइल एप, कलर रिङब्याक टोन तथा सामाजिक सञ्जालमार्फत जोखिमका संकेतबारे व्यापक सूचना प्रवाह गर्नुपर्ने उनको भनाइ छ।

‘विपद् आएपछि उद्धार गर्नुभन्दा जोखिमबारे सही सूचना समयमै घरघरमा पुर्‍याएर नागरिकको ज्यान जोगाउनु प्रभावकारी विपद् व्यवस्थापन हो,’ उनले भने।