काठमाडौं । राष्ट्रिय स्वतन्त्र पार्टीकी सांसद स्मृति सेञ्चुरीले जेनजी आन्दोलनका क्रममा पक्राउ परेर लामो समयदेखि थुनामा रहेका युवालाई दसैँअघि नै रिहा गर्न सरकारसँग माग गरेकी छन्।

प्रतिनिधिसभाको शून्य समयमा बोल्दै उनले कानुनले दिएको प्रक्रियाअनुसार बन्दी युवालाई दसैँमा परिवारसँग भेट्ने वातावरण बनाउन सरकारको ध्यानाकर्षण गराइन्।

आन्दोलनमा सहभागी भएकै आधारमा वा प्रदर्शनका क्रममा क्यामेरामा अनुहार देखिएकै कारण युवालाई लामो समय थुनामा राखिएको उनको दाबी छ। यस विषयमा पटकपटक सम्बन्धित मन्त्रालयको ध्यानाकर्षण गराए पनि समस्या समाधान हुन नसकेको उनले बताइन्।

‘कोही सडकबाट सदनसम्म आइपुगे, तर आन्दोलनमा सहभागी युवाहरू अझै आफ्नो घरको आँगनसम्म पुग्न पाएका छैनन्,’ उनले भनिन्।

सरकार कुन प्रक्रियामा अड्किएको हो र निर्णयका लागि कसको पर्खाइ भइरहेको छ भन्नेबारे स्पष्ट जानकारी दिन पनि उनले माग गरिन्।

सांसद सेञ्चुरीले दसैँको समयमा अधिकांश परिवार आफ्ना सदस्यसँग भेटघाट र खुसी साट्ने तयारीमा रहँदा केही परिवार भने थुनामा रहेका छोराछोरी घर फर्किने आशामा बसेको बताइन्।

केही दिनअघि प्रतिनिधिसभामा न्यायको माग गर्दै सहिदकी आमाले व्यक्त गरेको पीडालाई स्मरण गर्दै उनले राज्यले यस्ता परिवारको संवेदनालाई गम्भीर रूपमा लिनुपर्ने बताइन्।

‘हामीले पटकपटक सम्बन्धित मन्त्रालयमा कुरा पुर्‍यायौँ र सरकारको ध्यानाकर्षण गरायौँ, तर यो विषय अझै किन टुङ्गेन?’ उनले प्रश्न गरिन्।

कानुनले अनुमति दिएको अवस्थामा मानवीय संवेदनालाई समेत ध्यानमा राखेर दसैँअघि नै बन्दी युवाको रिहाइका लागि आवश्यक निर्णय गर्न उनले सरकारसँग आग्रह गरिन्।