रुपन्देही । तिनाउ नदीमा आएको बाढीका कारण रुपन्देहीको मायादेवी गाउँपालिका–२, बेथरीका ६० घर डुबानमा परेका छन्। बाढीको पानी घरभित्र पस्दा केही घरमा क्षतिसमेत पुगेको जिल्ला प्रहरी कार्यालय रुपन्देहीले जनाएको छ।

नदीको बहाव बढेसँगै बेथरीका ६० घरमा पानी पसेर डुबान भएको प्रहरीले जनाएको हो। डुबानमा परेका परिवारको अवस्था बुझ्न तथा उद्धारका लागि प्रहरी वरिष्ठ नायव निरीक्षक बालबहादुर घर्तीको नेतृत्वमा उद्धार टोली परिचालन गरिएको जिल्ला प्रहरी कार्यालय रुपन्देहीका प्रवक्ता डीएसपी कृष्णकुमार चन्दले जानकारी दिए।

प्रहरीका अनुसार डुबानमा परेका घरका सदस्यलाई सुरक्षित स्थानमा स्थानान्तरण गर्ने प्रयास भइरहेको छ। निरन्तर वर्षाका कारण नदीको बहाव थप बढ्न सक्ने भएकाले स्थानीयलाई सतर्क रहन आग्रह गरिएको छ।