काठमाडौं। पुर्वप्रधानन्यायाधिश चोलेन्द्र शमशेर जबराले सरकारसँग सुरक्षा माग गरेका छन्। उनले आफू र आफ्नो परिवार खतरामा परेको भन्दै काठमाडौँ उपत्यका प्रहरी कार्यालय रानीपोखरीमा निवेदन दिएका हुन्।  गुण्डागर्दी शैलीमा सरकारले बिना पक्राउ पुर्जी पक्राउ गरेपछि जबराले सुरक्षा खतरा बढेको निवेदनमा उल्लेख गरेका छन्। 

जबराले ‘आवश्यक शान्ति सुरक्षाको व्यवस्था गरी पाउँ’ भन्ने विषय उल्लेख गर्दै दिएको निवेदनमा पछिल्लो समय देशको अवस्था, सामाजिक सञ्जाल तथा विभिन्न गतिविधिका कारण आफूलाई सुरक्षा चुनौती महसुस भएको बताएका छन्। उनले आफूलाई राति निवासबाट प्रहरी कार्यालय लगिएको घटनापछि परिवारको सुरक्षाप्रति समेत चिन्ता बढेको उल्लेख गरेका छन्।

जबराको निवेदनअनुसार पछिल्लो समय आफूविरुद्ध विभिन्न अभिव्यक्ति तथा गतिविधि भइरहेको र त्यसका कारण आफ्नो तथा परिवारको सुरक्षामा थप जोखिम उत्पन्न हुनसक्ने अवस्था रहेको छ। उनले आफ्नो निवास तथा परिवारका सदस्यको सुरक्षाका लागि आवश्यक प्रबन्ध मिलाइदिन प्रहरीसँग आग्रह गरेका छन्।

यसअघि आइतबार राति जबरालाई महाराजगञ्जस्थित निवासबाट काठमाडौं उपत्यका अपराध अनुसन्धान कार्यालयको टोलीले टेकु लगेको थियो। प्रहरीले भने उनलाई पक्राउ गर्न नभई सुरक्षा चुनौतीका कारण सुरक्षाका लागि कार्यालयमा ल्याइएको दाबी गरेको छ। प्रहरीका अनुसार जबरामाथि सम्भावित आक्रमणको सूचना आएपछि सुरक्षाका लागि उनलाई कार्यालयमा राखिएको थियो। 

जबरालाई प्रहरी कार्यालय लैजाँदा अदालतबाट पक्राउ पुर्जी नलिइएको सम्बन्धमा पनि सार्वजनिक रूपमा प्रश्न उठेको छ। प्रहरी पक्षले भने यो पक्राउ नभएकाले पक्राउ पुर्जी आवश्यक नभएको दाबी गरेको छ। 

करिब १२ घण्टा प्रहरी कार्यालयमा राखिएपछि जबरालाई परिवारको जिम्मा लगाइएको र त्यसपछि उनले आफू तथा परिवारको सुरक्षाका लागि औपचारिक रूपमा प्रहरीसमक्ष निवेदन दिएका हुन्।