काठमाडौं । दशैं, तिहार र छठमा घर जाने यात्रुको चाप बढ्ने भएपछि सरकारले सार्वजनिक यातायातमा निगरानी कडा गर्ने भएको छ।

प्रतिनिधिसभाको पूर्वाधार विकास समितिको बैठकले चाडपर्वमा यात्रु आवागमनलाई सहज, सुरक्षित र व्यवस्थित बनाउन टिकट बिक्रीदेखि सवारीको प्राविधिक अवस्थासम्म कडाइका साथ अनुगमन गर्नुपर्ने निर्णय गरेको हो। समितिको बैठक असोज १२ गते बसेको थियो।

चाडपर्वको मौका छोपेर यात्रुसँग बढी भाडा असुल्ने, क्षमताभन्दा बढी यात्रु राख्ने र टिकट बिक्रीमा ठगी गर्ने प्रवृत्तिमाथि निगरानी बढाइने भएको छ। सवारीको निर्धारित भाडादर कार्यान्वयन भए नभएको पनि अनुगमन गरिनेछ।

त्यस्तै, लामो दूरीमा चल्ने सार्वजनिक सवारीको प्राविधिक परीक्षण, चालकको विश्राम, सवारीको गति नियन्त्रण र यात्रुको सुरक्षालाई प्राथमिकतामा राख्ने निर्णय भएको छ।

यात्राका क्रममा अस्वस्थकर खाना तथा खाद्य सामग्री बिक्री हुने गुनासोसमेत आउने भएकाले बाटोमा हुने यस्ता गतिविधिमाथि पनि अनुगमन गरिने भएको छ।

चाडपर्वका बेला सडकमा सवारीको चाप बढ्ने र लामो दूरीका यात्रुको संख्या पनि बढ्ने भएकाले दुर्घटना न्यूनीकरण तथा यात्रुको सुरक्षाका लागि सम्बन्धित निकायलाई थप सक्रिय बनाउने तयारी छ।

यसैबीच, सार्वजनिक यातायात व्यवस्थापनका लागि गठित उपसमितिमा रामनाथ पाण्डेलाई सदस्य चयन गरिएको छ।