काठमाडौं। झापाको बिर्तामोड नगरपालिका-५ मा एक युवतीलाई हातखुट्टा तथा घाँटी बाँधी पेट्रोल छर्केर आगो लगाउन खोजेको आरोपमा एक जना पक्राउ परेका छन्।

प्रहरीका अनुसार पक्राउ पर्नेमा किशनगञ्ज, भारतका ४२ वर्षीय दिलिप चन्द्र राय रहेका छन्। उनी बिर्तामोड-५ स्थित अमृत भोग मिठाई पसलमा काम गर्दै आएका थिए।

रायले मादक पदार्थ सेवन गरी पेट्रोलसमेत बोकेर २२ वर्षीया रिना मगरको कोठामा प्रवेश गरी उनलाई हातखुट्टा तथा घाँटी बाँधेर शरीरमा पेट्रोल छर्की आगो लगाउन खोजेको प्रहरीले जनाएको छ।

घटनाबारे जानकारी पाएपछि प्रहरी टोली घटनास्थलमा पुगेर रायलाई नियन्त्रणमा लिएको हो।

घटनामा घाइते रिना मगरको मनमोहन अस्पताल, बिर्तामोडमा उपचार भइरहेको प्रहरीले जनाएको छ।

घटनामा संलग्न रायलाई पक्राउ गरी घटनाबारे थप अनुसन्धान भइरहेको जिल्ला प्रहरी कार्यालय झापाले जनाएको छ।